Professional karyera yolunda zəngin təcrübə

Hal-hazırda Xəzər Universitetində magistr pilləsində Klinik psixologiya ixtisası üzrə təhsil alıram. Psixikadakı mədəni müxtəliflikləri incələmək, dissertasiyamda bu mövzunu araşdırmaq məqsədilə xaricdə təhsil proqramlarını araşdırmağa başladım. Beləliklə də, Erasmus+ mübadilə proqramı ilə tanış oldum.

Xarici bir ölkədə bir və ya iki semestrlik təhsil imkanı yaradan proqram dünyanın bir çox ölkəsindən olan tələbələri bir yerə toplayaraq, onlara yalnız təhsil baxımından yeni biliklər verməklə qalmır, eyni zamanda, gənclərə müxtəlif mədəniyyətlərlə tanış olmaları üçün şərait yaradır. Tələbələr üçün ayrılan təqaüd də buna imkan verir.

Türkiyənin Sabancı Universitetində bir semestrlik tələbə kimi deyə bilərəm ki, orada hər imkanın məhz sənin üçün olduğunu hiss edirsən, çünki mərkəzdə sənsən! 5 ay müddətində aldığım dərslərdən əlavə, Psixologiya laboratoriyasında təcrübə keçdim, müəllimim TUBİTAK-a layihə yazmağımı təşviq etdi və mən hazırladım.

Azərbaycan və Türkiyə universitet tələbələrində akademik göstərici (GPA), təşviş səviyyəsi və yaşam məmnuniyyəti arasındakı əlaqənin incələnməsi məqsədilə tədqiqat apardım, Psixologiya laboratoriyasında elektroensefaloqrafiya aparatı ilə tədqiqatların keçirilməsinə yardımçı oldum. Ekskursiyalar vasitəsilə Türkiyənin müxtəlif bölgələrini gəzdim, müxtəlif ölkələrdən bir çox dostlar qazandım.

İlahə Məmmədova