2023-cü il aprelin 3-də “Dünya” məktəbinin qurucu direktoru olnuş, görkəmli pedaqoq Nailəxanım İsayevanın anım günü keçirildi.

“Dünya” məktəbində yerləşən Nailəxanım Muzeyində keçirilən tədbirdə “Dünya” məktəbinin rəhbərliyi və müəllimləri, Xəzər Universitetinin təsisçisi, Direktorlar və Qəyyumlar Şurasının sədri professor, akademik Hamlet İsaxanlı, Şuranın üzvü və müşaviri Aygün Gardiner, universitetin rəhbərliyi və əməkdaşları, qonaqlar iştirak edirdilər.

Tədbirdə məktəbin Azərbaycan və rus bölmələrinin təhsil işləri üzrə direktoru Mərufə Mədətli, Xəzər Universiteti İngilis dili və ədəbiyyatı departamentinin baş müəllimləri Firəngiz Nəsirova, Lidiya Həmidova, Xalq artisti, tanınmış pianoçu professor Yeganə Axundova, “Loqos” Psixoloji və Nitq İnkişaf Mərkəzinin baş psixoloqu Elmira Mirzəyeva çıxış edərək, Nailəxanım İsayevanın yüksək peşəkar təhsil işçisi və müəllim, sadə, ədalətli rəhbər, insanları sevən, onlara xeyirxahlıq, qayğı ilə yanaşan bir insan olduğunu vurğuladılar, onun həm də musiqiçi, bəstəkarlıq fəaliyyətindən söz açdılar.

Tədbirdə Nailəxanım İsayevanın Hamlet İsaxanlının sözlərinə bəstələdiyi mahnılar ifa olundu. Yeganə Axundova pianoda “İnciçiçəyi”, “Dünya” məktəbinin musiqi müəllimi Ceyla Həsənova “Külək və qız”, Xəzər Universitetinin Kamera orkestri “Gözəldir”, “Tez Gəlin” mahnılarını səsləndirdilər.