2023-cü il fevralın 28-də “Dünya” məktəbinin “İnciçiçəyi” Konfrans-Konsert Salonunda “Dünya” məktəbinin və Xəzər Universitetinin təsisçisi, universitetin Direktorlar və Qəyyumlar Şurasının sədri professor, akademik Hamlet İsaxanlının 75 illik yubileyinə həsr olunmuş “Məchulları aydınladan ömür” adlı ədəbi-bədii musiqili tədbir keçirildi. Tədbirdə Xəzər Universiteti və “Dünya” məktəbinin rəhbərliyi və əməkdaşları, ölkənin görkəmli ədəbiyyat və mədəniyyət xadimləri, ziyalılar iştirak edirdilər.

Yubiley tədbiri Rəşid Behbudovun ifasında “Azərbycanım” (musiqisi Rauf Hacıyevin, sözləri Ənvər Əlibəylinindir) mahnısı ilə başlandı.

Sonra aparıcı – məktəbin ingilis dili müəllimi Arzu Ömərova riyaziyyat elmindən söz açaraq, yubilyara “bütün ömrünü məchulları araşdırmağa həsr edən alim kimi bu işdən nə zövq aldınız?” sualı ilə müraciət etdi. H. İsaxanlı sorğunu cavablandırandan sonra aparıcı mövzunu davam etdirərək bildirdi ki, “Dünya” məktəbi Ümumrespublika Riyaziyyat Olimpiadası keçirmiş və qaliblər məktəb tərəfindən diplom və sertifikatla təltif olunmuşlar. İstərdik ki, gələcəyin riyaziyyatçılarına mükafatlarını görkəmli riyaziyyatçı alim olaraq Hamlet İsaxanlı təqdim etsin. Bu, onların da həyatında unudulmaz anlara, xoş xatirələrə çevrilər.

H.İsaxanlı şagirdlərə diplom və sertifikatları təqdim etdi və onlara uğurlar arzuladı.

Sonra şagirdlər sözləri Hamlet İsaxanlının, musiqisi Nailəxanım İsayevanın olan “İnciçiçəyi”, “Gözəldir”, “Külək və qız” mahnılarını və onlara hazırladıqları rəqsləri ifa etdilər.

Məktəbin musiqi müəllimi, Beynəlxalq müsabiqələr laureatı, bəstəkar-pianoçu Zərif Kərimovanın bəstələdiyi, sözləri Hamlet İsaxanlının olan “Baş açmadım bu dünyadan” əsəri təqdim olundu.

Tədbirin qonaqları - Xalq şairi Ramiz Rövşən, Xalq artisti Ramiz Həsənoğlu, akademik Rafiq Əliyev, Milli Məclisin deputatı Ceyhun Məmmədov, Elm və Təhsil Nazirliyinin sektor müdiri Fuad Qarayev, filologiya elmləri doktoru, professor Asif Rüstəmli, şair Rüstəm Behrudi və valideyn Pünhan İsmayıl H. İsaxanlı haqqında ürək sözlərini söylədilər, onu təbrik etdilər.

“Dünya” Ana Məktəbinin balaçaları, “Dünya” məktəbi və Xəzər Universitetinin kollektiv rəqs ansamblı müxtəlf rəqslər ifa etdilər.

Aparıcı bildirdi ki, Hamlet müəllim haqqında qonaqların ürək sözlərini dinlədik. Amma uşaqların da onun haqqında fikirləri var və “Biz Hamlet müəllim haqqında nə düşünürük?” adlı videoçarx nümayiş etdirildi.

Aparıcının “Hamlet müəllim, xahiş edirik, görüşümüzü sizin şeirinizlə bitirək” müraciətinə cavab olaraq H.İsaxanlı içtirakçıları dərindən duyğylandıran “Gedin deyin anama” şeirini oxudu.

Şagirdlər yubilyara gül-çiçək verdilər, ona “Dünya” məktəbinin hədiyyəsi təqdim olundu.