2023-cü il fevralın 16-da Xəzər Universitetinin nəzdində fəaliyyət göstərən Kuantum İntellektual Oyunlar klubunun təşkilatçılığı ilə tələbələr və gənclər arasında “Poliqon Strateji İntellektual Oyun” (Poliqon SİO) keçirilmişdir. Yarış universitetin Mərmər zalında təşkil olunmuşdu.

ATU, UNEC, ADNSU, DGKA universitetlərindən ümumilikdə 6 komanda, gənclərdən ibarət 2 komanda və Xəzər Universitetini təmsil edən 2 komanda yarışda iştirak etmişdir. Hər komandada 6 nəfər olmaqla, ümumilikdə 60 nəfər yarışa qatılmışdı.

Yarış 4 turdan və 25 sualdan ibarət olmuşdur. Suallar Kuantum İntellektual Oyunlar Klubunun üzvləri İsmayıl Adıgözəlov, Tuqay Abdullazadə, Tamerlan Abdullazadə və Fuad Əmrəliyev tərəfindən hazırlanmışdı.

Hər turda keçən gərgin yarışmadan sonra UNEC-in “Qəzəlxan” komandası 500 xalla 1-ci, gənclərdən ibarət “Cəbrayılın Babil qülləsi” komandası 465 xalla 2-ci, ATU-nun “Sinaps” komandası isə 280 xalla 3-cü yeri tutdular. Qaliblərə sertifikat və medallar təqdim olundu.