2022-ci il noyabrın 30-da Xəzər Universitetində “Gələcək üçün Bacarıqlar” layihəsinin Tusi (2C) inkubasiya proqramının infosessiyası keçirilib. Məlumat sessiyasında layihənin meneceri Zinəddin Babayev, Xəzər Universitetinin Təbiət elmləri və mühəndislik fakültəsinin dekanı Fəxrəndə Əfəndiyeva, “Gələcək üçün Bacarıqlar” layihəsinin Xəzər Universiteti üzrə mentorları Fəridə Tatardar, Mehdi Kiyasatfar, Lalə Atamova, Kəmalə Mustafayeva, Humay Hüseynova, universitet əməkdaşları və tələbələr iştirak edib.

Fəxrəndə Əfəndiyeva innovasiya ekosisteminin əhəmiyyətindən, tələbələrin ideyalarını gerçəkləşdirmə fürsətlərindən danışıb.

İnfosessiyada layihənin meneceri Zinəddin Babayev tələbələrə Tusi (2C) inkubasiya proqramı haqqında ətraflı məlumat verib, qeydiyyat prosesi və tələbələri qarşıda gözləyən mərhələlər barədə danışıb.

Qeyd edək ki, Tusi (2C) inkubasiya proqramı “Gələcək üçün Bacarıqlar” layihəsinin ikinci komponentidir. İnkubasiya proqramının əsas məqsədi ölkədə innovasiya fəaliyyətinin davamlılığının təmin edilməsi, innovativ ideyaların inkişaf etdirilməsi üçün tələbələrin innovasiya və startap üzrə biliklərinin inkişafıdır. Ümumilikdə 3 aylıq dövrü əhatə edən proqramda bir sıra təlimlər, xarici və yerli ekspert görüşləri, layihələrin işlənilməsi, sahələr üzrə səfərlərin, müxtəlif “camp”lər və sonda “Pitch Day”in keçirilməsi planlaşdırılır.