2022-ci il noyabrın 2-də Xəzər Universiteti, “Aydınlığa doğru” Milli-Mənəvi Dəyərlərin Qorunması İctimai Birliyi və “Damla” Aztəminatlı Ailələrə Qayğı İctimai Birliyinin təşkilatçılığı ilə universitetin Mərmər salonunda Hacı Zeynalabdin Tağıyevə həsr olunmuş “100 il şərəfli ömür” filminin təqdimatı keçirildi. Ekran əsərinin ssenari müəllifi, quruluşçu rejissoru və baş prodüseri Cəlaləddin Qasımovdur.

Universitetin İctimai əlaqələr və media üzrə direktoru Əlövsət Əmirbəyli tədbiri giriş sözü ilə açaraq, qonaqları və toplaşanları salamladı, tədbirin tələbələr üçün əhəmiyyətindən danışdı.

“Aydınlığa doğru” İctimai Birliyinin sədri, tanınmış telejurnalist Solmaz Əmirli Hacı Zeynalabdin Tağıyevin Azərbaycandan kənarda tanınmasına xidmət edən bədii-sənədli filmin yüksək sənətkarlıqla hazırlandığını, Lissabonda “Heritales International Heritage” Film Festivalının finalçı sertifikatına layiq görüldüyünü, həmçinin Lissabondakı Lusofona Universitetində nümayiş olunduğunu diqqətə çatdırdı. Qeyd etdi ki, bu festivala dünyanın fərqli mədəniyyətlərinin tanıdılması, mədəni irs tarixi mövzusunda çəkilmiş filmlər qəbul edilir.

Film nümayiş etdirldi. Nümayişdən sonra tarixçi alim, professor Fidovsiyyə Əhmədova, AMEA-nın elmi işçisi, Azərbaycan İlahiyyat Universitetinin müəllimi Elvüsal Məmmədov, İqtisadi Araşdırmalar və Tədris Mərkəzinin rəhbəri, Xəzər Universitəsinin müəllimi Radil Fətullayev və “Dimet” klinikasının baş həkimi Səfərbəy Səfərbəyov çıxış etdilər. Onlar milli-mənəvi dəyərlərin qorunmasında vacib olan məqamlardan danışdılar.

Tədbirin davamı olaraq tələbələr H.Z.Tağıyevlə bağlı verilmiş 5 sualı cavablandırdılar. Seçilmiş tələbələr mükafatlandırıldılar. Sonda Xəzər Universitetinin rəhbərliyinə göstərdiyi dəstəyə görə təşəkkür edildi. Tədbir AZTV-nin “Mədəniyyət” kanalında işıqlandırılıb.