2022-ci ilin noyabrın 1-də “Teknofest”-in Azərbaycandakı rəsmi nümayəndəliyi “Bilim Bakı” Mərkəzinin direktoru Yusuf Polat Xəzər Universitetinin tələbələri üçün infosessiya keçirmişdir.

Tədbirdə Xəzər Universitetinin rektoru dosent İradə Xəlilova, İctimaiyyətlə əlaqələr və media üzrə direktor Əlövsət Əmirbəyli, Təbiət elmləri və Mühəndislik fakültəsinin dekanı dosent Fəxrəndə Əlimərdanova, departament rəhbərləri, müəllim və tələbələr iştirak ediblər.

Fəxrəndə Əlimərdanova tədbiri giriş sözü ilə açaraq, qonaqları və tələbələri salamlayıb, “Teknofest” yarışması və Xəzər Universitetinin festivalda iştirak edən tələbələri haqqında ətraflı məlumat vermişdir. Rektor İradə Xəlilova universitet tələbələrinin bu cür yarışmalarda iştirakının onların gələcək fəaliyyəti üçün faydalı olduğunu bildirib, tələbələri belə yarışlarda aktiv iştirak etməyə çağırıb.

Tədbirin digər hissəsi olan infosessiya “Bilim Bakı” mərkəzinin direktoru Yusuf Polatın təqdimatı ilə davam edib. Təqdimat tələbələrin böyük marağı ilə qaşırılanıb və onların sualları Yusuf Polat tərəfindən cavablandırılıb.