2022-ci il oktyabrın 14-də Xəzər Universitetinin Beynəlxalq əlaqələr şöbəsi universitetə yeni qəbul olunmuş əcnəbi tələbələr üçün Oriyentasiya günü keçirdi. Tədbir zamanı yeni gələn tələbələr qayda və prosedurlar barədə məlumat, habelə, Azərbaycanda yaşamaq üçün faydalı tövsiyələr əldə etdilər.

Tədbir universitetin rektoru dosent İradə Xəlilova və Beynəlxalq əlaqələr üzrə prorektor Vlad Vernygora`nın tələbələri salamlaması və onlara universitet həyatında uğurlar arzulaması ilə başladı.

Həmçinin, İqtisadiyyat və menecment fakültəsinin dekanı Ceyhun Məmmədov, Təbiət elmləri və mühəndislik fakültəsinin dekanı Fəxrəndə Əlimərdanova, Humanitar, təhsil və sosial elmlər fakültəsinin dekanı Elza Səmədova yeni qəbul olmuş əcnəbi tələbələrə tədris ilində uğurlar arzuladılar.

Sonra tələbələrin bir-birlərini tanımasına imkan yaradan əyləncəli oyun təşkil edildi. Tədbirin sonuna yaxın cari əcnəbi tələbələr öz təcrübələrini, Azərbaycan haqqında biliklərini yeni tələbələr ilə bölüşdülər. Əlavə olaraq, tədbirdə iştirakı baş tutmayan bir sıra cari tələbələrin kiçik video mesajları sessiyanın sonunda təqdim edildi.

Sonda tədbirdə iştirak edən tələbələrə Xəzər Universiteti adından hədiyyələr verildi.