2022-ci il oktyabrın 14–də Xəzər Universiteti Elmi şurasının növbəti iclası keçirildi.

İclası universitetin rektoru dosent İradə Xəlilova açaraq, Azərbaycan Respublikasının Prezidenti İlham Əliyevin 4 oktyabr 2022-ci il tarixli Sərəncamı ilə beynəlxalq və respublika fənn olimpiadalarının keçirilməsində və şagirdlərin hazırlığı sahəsində xüsusi nailiyyətlərinə görə “Əməkdar müəllim” fəxri adına layiq görülmüş Riyaziyyat departamentinin professoru Nazım Kərimovu kollektiv adından təbrik etdi və elmi-pedaqoji fəaliyyətində ona yeni uğurlar arzuladı.

Sonra rektor gündəlikdəki məsələləri elmi şura üzvlərinin nəzərinə çatdırdı və elmi şuranın yeni tərkibi ilə şura üzvlərini tanış etdi.

Gündəliyin 1-ci məsələsi olan məzunlar haqqında məlumatları İqtisadiyyat və menecment fakültəsinin dekanı Ceyhun Məmmədov, Təbiət elmləri və mühəndislik fakültəsinin dekanı Fəxrəndə Əlimərdanova, Humanitar, təhsil və sosial elmlər fakültəsinin dekanı Elza Səmədova, Təbiət elmləri, sənət və texnologiya yüksək təhsil fakültəsinin dekanı Səidə Şərifova və İqtisadiyyat və biznes yüksək təhsil fakültəsinin dekanı İnqilab Əhmədov təqdim etdilər. Universitetin məzun olan bakalavriatura və magistratura tələbələri, onların qiymətləri, ixtisasları və s. haqqında ətraflı məlumat dinlənildi və məsələlər barədə müzakirələr aparıldı.

Təbiət elmləri, sənət və texnologiya yüksək təhsil fakültəsinin və İqtisadiyyat və biznes yüksək təhsil fakültəsinin dekanları tərəfindən 2-ci məsələyə uyğun magistratura tələbələrinin tezis mövzuları və elmi rəhbərləri barədə şura üzvlərinə məlumat verildi.

Gündəlikdəki 3-cü məsələ, Universitetin 5310.01 – “Dünya iqtisadiyyatı” ixtisası üzrə xarici doktorantının dissertasiya işinin ilkin müzakirəsinin protokolu elmi katib tərəfindən şura üzvlərinin nəzərinə çatdırıldı.

Gündəliyin növbəti məsələsi kimi Xəzər Universitetinin Etik Tədqiqat Komitəsinin əsasnaməsi və müvafiq sənədlər şura üzvlərinin nəzərinə çatdırıldı və müzakirə aparıldı. Əsasnamə və komitəyə müraciət forması ilə bağlı şura üzvlərinin təklifləri və rəyləri dinlənildi.

Dillər və ədəbiyyatlar departamentinin müəllimi filologiya üzrə fəlsəfə doktoru Aynur Qəzənfərqızının Azərbaycan dili və ədəbiyyatı müəllimliyi və Azərbaycan filologiyası ixtisasları üzrə tərtib etdiyi “Folklorşünaslığın müasir problemləri” adlı dərs vəsaitinin təsdiq olunması barədə məlumat vermək üçün söz departament müdirinə verildi və iclas iştirakçıları sonuncu məsələni müzakirə etdilər.

Elmi şuranın gündəliyində duran cari məsələlər qismində hər akademik ilin sonunda departamentlərin elmi - pedaqoji fəaliyyətinin nəticələrinin elmi şura qarşısında dinlənilməsi ilə bağlı təklif irəli sürüldü və müzakirə aparıldı.

Elmi şuranın gündəliyindəki bütün məsələlərlə bağlı müsbət qərarlar qəbul edildi.