2022-ci il oktyabrın 6-da Xəzər Universitetinin 2022-2023-cü illər üçün dəvətli alimlərin seminar silsiləsi çərçivəsində ABŞ-ın Puerto-Riko Universitetinin Tibb fakültəsinin professoru, tibb elmləri doktoru Səbzəli Cavadov "Ferroptoz hüceyrə ölümünün yeni mexanizmi kimi: mitoxondrinin rolu" (Ferroptosis as a new mechanism of cell death: the role of mitochondria) mövzusunda elmi seminar proqramı ilə çıxış etmişdir.
Seminarda Xəzər Universitetinin rektoru dosent İradə Xəlilova, Həyat elmləri departamentinin müəllim heyəti, bakalavr, magistr və doktorantura pilləsində təhsil alan tələbələrlə yanaşı, V.Y.Axundov adına Elmi-Tədqiqat Tibbi Profilaktika İnstitutunun direktoru, tibb elmləri doktoru, professor Adil Allahverdiyev, Qida Təhlükəsizliyi İnstitutunun, Bakı Dövlət Universitetinin və Genetik Ehtiyatlar İnstitutunun gənc alim və mütəxəssisləri iştirak etmişlər.
Seminar zamanı ətraflı elmi müzakirələr aparılaraq, tələbələrin sualları cavablandırılmış və sonda professor Səbzəli Cavadova sertifikat təqdim olunmuşdur.