2022-ci il sentyabrın 20-22-də Xəzər Universitetinin Beynəlxalq əlaqələr ofisinin təşəbbüsü ilə İnfosessiya həftəsi keçirildi.

Layihə çərçivəsində ilk gün - sentyabrın 20-də Erasmus+ Tələbə Mobilliyi üzrə məlumat sessiyası baş tutdu. Sessiyada universitetin Beynəlxalq əlaqələr üzrə prorektoru Vlad Vernygora və Beynəlxalq əlaqələr ofisindən Fatimə Vəliyeva Erasmus+ Tələbə Mobilliyi üzrə universitetlərə müraciət prosesi haqqında tələbələrə ətraflı məlumat verdilər.

Sessiyada, Türkiyə və İspaniyanın müxtəlif universitetlərində hazırda mübadilə proqramında olan tələbələr onlayn olaraq iştirak etdilər və Erasmus təcrübələrini paylaşdılar.

Məlumat sessiyasının ikinci günü - sentyabrın 21-də Azərbaycanlı Tələbələr və Məzunlar Platformasının (ASAP) əməkdaşları ilə görüş keçirildi. ASAP platformasının Layihə meneceri Sevda Mansurova və Beynəlxalq əlaqələr üzrə menecer Ramiyyə Şahgəldiyeva xaricdə təhsil almaq istəyən tələbələrə ASAP-ın fəaliyyəti, layihələr və gələcəkdə həyata keçiriləcək fəaliyyət planı ilə bağlı ətraflı izahat işi apardılar.

Məlumat sessiyasının üçüncü günü - sentyabrın 22-də Vətəndaş Cəmiyyətində Debat İctimai Birliyinin komandası ilə tələbələr arasında görüş keçirildi. Görüşdə İctimai Birliyin İctimaiyyətlə əlaqələr üzrə meneceri Suraya Rzayeva, Layihələr üzrə meneceri Kamil Seyidzadə, Milli Debat Proqramının üzvü Yaqut Novruzova, “Youth Inc” Sahibkarlıq Proqramının nümayəndələri Səfiyyə Babazadə və Mirzəli Mirzəzadə iştirak etdilər. Görüşün əsas məqsədi Xəzər Universitetində Debat İctimai Birliyinin nümayəndəliyinin ilkin formalaşmasını təmin etmək və tələbələrə Vətəndaş Cəmiyyətində Debat İctimai Birliyinin fəaliyyəti, layihələri barədə ətraflı məlumat vermək idi.