“Gələcəyini qur!” Gəncliyə Dəstək Layihəsi Build Your Future MMC

Xəzər Universitetinin təsisçisi,
Direktorlar və Qəyyumlar Şurasının sədri
Professor Hamlet İsaxanlıya

Hörmətli Hamlet müəllim,

Sizi “Gələcəyini Qur!” Gəncliyə Dəstək Layihəsi adından salamlayır, yeni 2022-2023-cü tədris ilinin başlanması münasibətilə təbrik edirəm.

Məmnuniyyətlə qeyd etmək istəyirəm ki, layihəmizin 2021-2022-ci tədris ili uğurla tamamlanmışdır. Layihədə Bakı və beş regiondan (Ağdaş, Hacıqabul, Kürdəmir, Ucar, Yevlax) iştirak edən 156 gənc tələbə adını qazanmışdır. Bu gənclərdən 16 nəfəri Xəzər Universitetini seçmişdir. Xəzər Universitetinə qəbul olmuş Layihə məzunlarının siyahısını bu məktuba əlavə edirəm.

Böyük sevinclə Sizə daha xoş bir xəbəri çatdırıram. Layihəmizin cari qəbul nəticələri arasında ən yüksək – 662.1 bal toplamış Ehsani Məsumə də Xəzər Universitetini seçmişdir. Məsumə çalışqan, məsuliyyətli, öz üzərində işləyən və təhsilə çox böyük həvəsi olan gəncdir. Layihə iştirakçısı kimi Məsumə dərslərdə həvəs və əzmlə çalışırdı, Layihənin bütün tədbir və fəaliyyətlərində iştirak edirdi. Əminəm ki, tələbə kimi də Məsumə əzmkarlıq və çalışqanlığı ilə seçiləcək, seçdiyi kömpüter elmləri sahəsində uğur qazanacaqdır.

Qeyd etmək istərdim ki, Layihəmizin cari 2022-2023-cü tədris ilində dərslər artıq başladı, çox yaxın zamanda Layihəmizin tədbirlərinə də start verəcəyik. Xatırlayacağınız kimi, Layihəmizin keçən ilinin ilk tədbiri məhz Xəzər Universitetində baş tutmuşdu. 19 dekabr 2021-ci il tarixində keçirilmiş, elm və məsuliyyət dəyərlərinə həsr olunmuş tədbirimizdə Siz də spiker kimi çıxış etmişdiniz, gənclərlə öz təcrübənizi paylaşıb, dəyərli məsləhətlərinizi vermişdiniz. Ümid edirik ki, Layihəmizin yeni, sayca 9-cu ilinin iştirakçıları olan abituriyentlər üçün tədbirlərimizdən birini Xəzər Universitetində təşkil edərək, gəncləri universitetlə tanış etməklə yanaşı, onlara məqsədlərinə çatmaq üçün motivasiya verəcəyik.

Dəstəyinizə görə əvvəlcədən minnətdarlığımızı bildiririk və yeni tədris ilində Sizə və Xəzər Universitetinin bütün əməkdaş və müəllimlərinə yeni nailiyyətlər arzu edirik. 

Bəhruz Hidayətzadə

“Gələcəyini Qur!” GDL-nin həmtəsisçisi
“Build Your Future” MMC-nin direktoru

16 sentyabr 2022-ci il

***

“Gələcəyini Qur!” GDL-nin həmtəsisçisi
“Build Your Future” MMC-nin direktoru
Bəhruz Hidayətzadəyə

Hörmətli Bəhruz müəllim,

“Gələcəyini qur!” layihəsinin növbəti uğurları mübarək olsun!

Sizi və uğur qazanan tələbələrimizi təbrik edirəm!

Hörmətlə,

Hamlet İsaxanlı

17 sentyabr 2022-ci il