2022-ci il sentyabrın 4-də Bakı Biznes Universitetinin koordinatorluğu ilə həyata keçirilən “Azərbaycanda Rektorlar Konfransının yaradılması” (ECAR) adlı Erasmus+ layihəsinin növbəti iclası Odlar Yurdu Universitetində keçirilib. Tədbirdə Odlar Yurdu Universitetinin rektoru professor Əhməd Vəliyev, layihə konsorsiumunun üzvü olan universitetlərin prorektorları və digər rəhbər şəxslər iştirak ediblər.

İclası giriş sözü ilə açan Odlar Yurdu Universitetinin prorektoru, dosent Qabil Qafarov iştirakçıları salamlayaraq, universitet və bir sıra yeniliklər haqqında ümumi məlumat verdi. İclasda layihənin 3-cü iş planı paketinin, o cümlədən Rektorlar Konfransının Strateji Planının və 2023-2025-ci illəri əhatə edən Fəaliyyət Planının hazırlanmasına dair məsələlər müzakirə edilib. Bildirilib ki, layihənin xarici tərəfdaşlarından olan Fransa Təhsil İnstitutunun bələdçiliyi ilə icra edilən 3-cü iş planının icrasına cari ilin mart ayından başlanılıb və bu istiqamətdə Bakı Biznes Universiteti və Fransa Təhsil İnstitutunun iştirakı ilə bir sıra onlayn görüşlər keçirilib.

Layihənin koordinatoru, Bakı Biznes Universitetinin Universitet-Sənaye işbirliyi departamentinin direktoru Gülşən Bayramova vurğulayıb ki, bu müddət ərzində müvafiq iş planına uyğun olaraq layihə çərçivəsində yaradılacaq komitələrlə bağlı qərar qəbul etmək məqsədilə 20 universitetdən 48 prorektorun iştirakı ilə sorğu keçirilib. Sorğunun nəticələrinə əsasən milli səviyyədə mövcud olan ehtiyaclar, eləcə də sorğudan əldə edilmiş nəticələr əsasında müvafiq komitələrin yaradılması qərara alınıb. Belə ki, Litvanın Mykolas Romeris Universitetinin nəzarəti altında Təhsil İşləri və Keyfiyyət Təminatı, İsveçin Kral Texnologiya Universitinin nəzarəti altında Elmi işlər, Polşa Rektorlar Konfransının nəzarəti altında Ali Məktəblərin Strateji İdarə Edilməsi, Belçikanın EFMD Akkreditasiya Təşkilatının nəzarəti altında Beynəlxalq Əlaqələr və Fransanın Təhsil İnstitutunun nəzarəti altında Tələbə İşləri üzrə komitələrin fəaliyyət göstərməsi nəzərdə tutulur. Qeyd edilib ki, ilk təlim CPU/FEI tərəfindən CRUE, KTH, MRU/LURK və CRASP-nin iştirakı ilə 2022-ci ilin oktyabrında təşkil olunacaqdır.

Sonra Strateji Planın tərtib edilməsi üzrə yaradılmış işçi qrupu arasında iş bölgüsü aparılıb, nəzərdə tutullan tapşırıqların icra mexanizmləri müzakirə edilib. G.Bayramova yekunda qeyd edib ki, layihə çərçivəsində Rektorlar Konfransının 2023-2025-ci illəri əhatə edən Strateji Planının hazırlanmasına yaxın zamanda start veriləcəkdir.

İnkişaf ofisinin direktoru Raziyə İsayeva Xəzər Universitetinin rəsmisi olaraq iclasda qeyd olunan məsələlər ətrafında geniş müzakirələrə qoşulub.