2022-ci il sentyabrın 1-4-də Xəzər Universiteti Həyat elmləri departamentinin Baytarlıq təbabəti üzrə koordinatoru b.ü.f.d. Ayaz Məmmədov, dosenti Cavid Ocaqi və Sənət və texnologiya yüksək təhsil fakültəsinin magistratura üzrə dekan müavini dosent Məhəmməd Eldarov Azərbaycan Dövlət Aqrar Universitetinin (ADAU) Baytarlıq təbabəti fakültəsində və Heyvandarlıq Elmi Tədqiqat İnstitutunda (HETİ) ezamiyyədə olmuşlar.

Ezamiyyə çərçivəsində Xəzər Universitetinin əməkdaşları ilk öncə ADAU-nun Baytarlıq təbabəti fakültəsinin dekanı professor Famil Nəsibov və dekan müavini a.e.f.d. Gülçin Məmmədova ilə görüşərək, əməkdaşlıq müzakirə olundu. Sonra isə fakültənin bir sıra laboratoriyaları, vivarium və Baytarlıq klinikası ilə tanışlıq oldu. Aparılan müzakirə zamanı Xəzər Universitetində Baytarlıq Klinikasının qurulmasına lazım olan dəstəyi göstərəcəklərini bildirdilər.

Səfərin növbəti günü A.Məmmədov, C.Ocaqi və M.Eldarov Heyvandarlıq Elmi Tədqiqat İnstitutunda olarkən müəssisənin direktoru a.e.ü.f.d., dosent Mahir Hacıyevlə görüşdülər. Görüşdə tərəflər arasında birgə elmi tədqiqatların aparılması, layihələrin icrası, tələbələrin HETİ-də təcrübə keçmələri və s. məsələlər geniş müzakirə olundu. Sonra isə Xəzər Universitetinin əməkdaşları institutun laboratoriyaları və tədqiqat bazası ilə tanış edildi.