2022-ci il iyulun 21-də London Metropolitan Universiteti (Böyük Britaniya) və British Council (Britaniya şurası) tərəfindən ortaq icra edilən “Big Idea Challenge 2022” müsabiqəsi qaliblərinin mükafatlandırılması mərasimi həyata keçirildi. Mərasimdə Böyük Britaniya və Şimali İrlandiya Birləşmiş Krallığının Azərbaycandakə Fövqəladə və səlahiyyətli səfiri James Lyle Sharp iştirak edirdi.

Qürurverici haldır ki, bu il də ölkə üzrə çempion və qaliblər məhz Xəzər Universitetindən oldu.

Ölkə üzrə çempion:

1. İbrahim Gülmalıyev, Namiq Əlizadə və Nuray Əliyeva, İqtisadiyyat və menecment fakültəsi, Biznesin idarə edilməsi ixtisası.

Kateqoriya üzrə qaliblər:

2. İbrahim Gülmalıyev, Namiq Əlizadə və Nuray Əliyeva, İqtisadiyyat və menecment fakültəsi, Biznesin idarə edilməsi ixtisası, Rəqəmsal Texnologiya kateqoriyası üzrə ölkə qalibi.
3. Etibar Xıdırov İqtisadiyyat və menecment fakültəsi, Turizm və otelçilik ixtisası və Türkan Mürsəlova, Humanitar, təhsil və sosial elmlər fakültəsi, Azərbaycan dili və ədəbiyyatı ixtisası, Sosial təsir kateqoriyası üzrə ölkə qalibi

İbrahim, Namiq və Nurayı ölkə çempionu edən “MOOD” ideyası şagird və tələbələrə psixoloji cəhətdən kömək etmək üçün nəzərdə tutulmuş proqram idi. Həmçinin, Etibar və Türkanın ölkə qalibi olmasına imkan verən ideya isə sosial və sosial sahibkarlıq layihələrini, QHT-ləri və icma qruplarını bir araya gətirən onlayn platforma olan “Destekchi” idi.

"Big Idea Challenge" müsabiqəsi Creative Spark proqramının həyata keçirildiyi ölkələrdən olan gəncləri yenilikçi "startap"lar yaratmağa təşviq edən videotəqdimat müsabiqəsidir. Müsabiqə British Council`ın təşəbbüsü ilə, İqtisadi İslahatların Təhlili və Kommunikasiya Mərkəzi və Birləşmiş krallığın Newcastle Universiteti ilə birgə əməkdaşlıq çərçivəsində aparılan “Creative Spark” layihəsinin bir parçasıdır. Layihə sahibkarlığın əsaslarını və ideyanı konsepsiyadan reallığa necə inkişaf etdirməyi öyrətmək məqsədi güdən British Council-ın 60 saniyəlik video müsabiqəsidir. Müsabiqənin əsas məqsədi “Creative Spark” proqramı çərçivəsində Azərbaycandan olan tələbələri və onların yeni biznes ideyalarını dəstəkləmək və istedadlıları üzə çıxarmaqdır.

Təbiət elmləri və mühəndislik fakültəsinin tələbəsi Təravət Əsgərova ötən il Sosial təsir kateqoriyasında ölkə qalibi olmaqla bugünki nailiyyətə bir yol açmışdı.

Qaliblər fərdi biznes dəstəyi və biznes ideyasını həyata keçirmək üçün əlavə maddi dəstək əldə edəcəklər.