Xəzər Universitetində British Council-ın Creative Spark: Ali Təhsil Müəssisə Proqramı tərəfindən maliyyələşdirilən və Middlesex Universiteti ilə birgə həyata keçirilən Creative Spark layihəsi başa çatdıqdan sonra Xəzər Universitetində iki günlük beynəlxalq konfrans keçirilib.

2022-ci il iyunun 13-də konfransın ilk günü seminar formatında təşkil olundu və Azərbaycanın müxtəlif universitetlərinin professor-müəllim heyəti, tələbələri və məzunları sahibkarlıq, sahibkarlıq fənlərinin kurrikuluma daxil edilməsi və bir çox digər əlaqəli mövzuları öyrənmək üçün bir araya gəldilər. Seminarlar üç hissədən ibarət olub.

Birinci hissədə Azərbaycanın 10-dan çox müxtəlif universitetinin professor-müəllim heyəti sahibkarlıq mövzusunu müzakirə etdilər. Middlesex Universitetiindən olan təlimçilər sahibkarlığın kurrikuluma inteqrasiyası yollarından danışdılar.

Seminarın ikinci hissəsində tələbələr və əməkdaşlar tələbələrin ideyalarını dəstəkləməyin yollarını müzakirə etdilər. Sonuncu seminarda tələbələr ayrı-ayrılıqda sahibkarlıq, startap və daxili sahibkarlıq mövzularını, həmçinin təhsilləri vasitəsilə çoxsaylı layihələrə qoşulmağın əhəmiyyətini müzakirə etdilər.

İyunun 14-də Beynəlxalq Creative Spark Konfransı daha geniş auditoriya ilə işini davam etdirərək, sahibkarlıq təhsili, onun iqtisadi inkişafa təsiri, universitet təhsili və sənaye ilə əməkdaşlıqdan bəhs olundu. Konfrans Middlesex Universitetinin və Xəzər Universitetinin akademik heyət üzvlərini, Azərbaycan və Böyük Britaniyadan sənaye sahəsində olan təcrübəçiləri, gənc və qadın sahibkarları bir araya gətirdi. Xəzər Universitetinin rektoru dosent İradə Xəlilova konfrans iştirakçılarını salamladı və universitetlərdə sahibkarlığın əhəmiyyətindən danışdı.

British Council-ın Ölkə üzrə Direktoru Nərgiz Hacıyeva çıxış edərək Creative Spark layihəsi, British Council-ın Azərbaycan Universitetləri ilə əməkdaşlığı, xüsusilə Xəzər Universiteti ilə birgə həyata keçirdiyi beynəlxalq layihələrin sayı və keyfiyyətindən söz açdı.

Middlesex Universitetinin Kompüter Elmləri proqram direktoru Dr. Georgios Dafoulas iştirakçıları salamladı və Xəzər Universitetində həyata keçirilən sahibkarlıq fəaliyyətləri və biliklərin transformasiyası haqqında danışdı.

Növbəti sessiyalarda Middlesex Universitetinin nümayəndəsi Dr. Simon Best və Böyük Britaniyanın Oracle TES şirkətinin nümayəndəsi Dr. Endi Goldinq innovasiya və sahibkarlığın əsas anlayışları haqqında təqdimatla çıxış etdilər.

Azərbaycan Beynəlxalq Bankı İdarə Heyəti sədrinin müşaviri Zaur Ələkbərov Azərbaycan Beynəlxalq Bankı nəzdində fəaliyyət göstərən inkubasiya və akselerasiya mərkəzinin fəaliyyətindən danışıb.

Sonra inklüzivlik və davamlılıq üzrə ekspert Tatyana Mikayılova və Maestro şirkətinin təsisçisi Mədinə Paşayeva qadınların sahibkarlığı və səlahiyyətlərinin artırılması haqqında çıxış ediblər. Tədbir Xəzər Universitetinin İnkişaf üzrə direktoru Raziyə İsayevanın iki günlük tədbirin əsas məqamlarından ibarət çıxışı ilə yekunlaşıb.

Tədbirin sonunda iştirakçılara sertifikat təqdim olunub.