2022-ci il mayın 13-də Xəzər Universiteti və “Coders Azerbaijan” şirkətinin əməkdaşlığı çərçivəsində tələbələr üçün proqramlaşdırma üzrə iki aylıq layihənin yekun tədbiri keçirilmişdir.
Layihəyə tələbələr imtahan yolu ilə seçilmişdi. İmtahandan uğurla keçmiş 25 tələbə 2 ay ərzində proqramlaşdırma üzrə praktiki bliklərini təkmilləşdirmişdir. 25 tələbədən 20-si təlim proqramını bitirmiş, onlardan 10-u yekun layihəsini təqdim etmişdir. Altı tələbənin layihəsi ekspertlər tərəfindən yüksək qiymətləndirilmişdir. Proqramı uğurla tamamlamış tələbələrə sertifikatı və ilk 3 yerin qaliblərinə isə “Coders Azerbaijan” şirkəti tərəfindən pul mükafatı verilmişdir.
Tədbirdə Xəzər Universitetinin rektoru dosent İradə Xəlilova, Təbiət elmləri və mühəndislik fakültəsinin dekanı Dr. Fəxrəndə Əlimərdanova, Kompüter elmləri departamentinin müəllimi Behnam Kiani iştirak etmişlər.
Sonda dosent İradə Xəlilova proqramı uğurla tamamlamış tələbələri və qalibləri təbrik etmiş, tələbələr üçün bu tip layihələrin davamlı olmasının zəruriliyini vurğulamışdır. “Coders Azerbaijan” Xəzər Universitetinə əməkdaşlığa görə təşəkkürünü bildirmiş və şirkətin hədiyyəsini təqdim etmişdir.