Xəzər Universitetinin nəzdində fəaliyyət göstərən Mövlana Ədəbi Fəlsəfi Araşdırmalar İnstitutunda (MƏFAİ) yaradılmış “Mövlana” şeir məclisinin növbəti yığıncağı 2022-ci il aprelin 29-da universitetin Mərmər zalında baş tutdu. Tədbirdə universitetin tələbə-müəllim heyəti ilə yanaşı ölkənin digər qurumlarından da qonaqlar iştirak edirdi.

İnstitutun direktoru dosent Nəzakət Məmmədli tədbiri açaraq, sözü məclisdə iştirak edən şairlərə verdi. Şairə Şəlalə Ana çıxışına Məhəmməd Füzulinin “Söz” qəzəli ilə başlayaraq, ardınca öz şeirlərini oxudu. Universitetin müəllimi şair Qardaşxan Əzizxanlı şeir məclisi haqqında öz fikirlərini bildirdi və öz şeirlərindən bir neçəsini qonaqların diqqətinə çatdırdı.

Tədbirdə, həmçinin, hazırda universitetdə təhsil alan istedadlı gənclər də iştirak edirdilər. Onlardan da bir neçəsi - Fəridə Abdullayeva, Azər Hacıyev, Həsən Hüseynov öz şeirlərini oxudular. Sonra Nəzakət Məmmədli Qazi Bürhanəddin yaradıcılığından bir şeir nümunəsində poetika elmi haqqında məlumat verdi və öz şeirlərindən də bir neçəsini dinləyicilərə təqdim etdi.