2022-ci il aprelin 28-də Canon şirkətinin Azərbaycandakı nümayəndəliyi Xəzər Universiteti ilə əməkdaşlıq çərçivəsində tələbələr üçün növbəti təqdimat keçirmişdir. Tədbirdə Xəzər Universitetinin rektoru İradə Xəlilova, Canon şirkətinin biznesin inkişafı üzrə meneceri Valeh Məhərrəmov, menecer köməkçisi Mehbarə Hüseynova, fotoqraf Bəhmən Mirzəyev, Xəzər Universitetinin əməkdaşları və tələbələri iştirak etmişdir.
Görüşü rektor İradə Xəlilova açaraq iştirakçıları salamladı, tədbirin işində uğurlar arzuladı. Valeh Məhərrəmov şirkət və görüşün məqsədi haqqında tələbələrə məlumat verdi, ardınca fotoqraf Bəhmən Mirzəyev tələbələrin marağına səbəb olan yarışma xarakterli təqdimatla çıxış etdi. Universitetin 6 tələbəsi suallara düzgün cavab verərək, Canon şirkətindən maraqlı hədiyyələr qazandılar.
Tədbirdən sonra Canon şirkətinin əməkdaşları Xəzər Universitetinin Multimedia Mərkəzində oldular, mərkəzin direktoru Natella Barkaya qonaqları mərkəzlə tanış etdi, mərkəzin məzunları, gördüyü işlər haqqında məlumat verdi.
Qeyd edək ki, aprelin 20-də Canon şirkəti Bakıdakı Excelsior otelində Xəzər Universiteti ilə əməkdaşlıq çərçivəsində “Yeni güzgüsüz kameralar” adlı ustad dərsi də keçirmişdi. Dərsdəiki peşəkar fotoqrafın yeni kameralar haqqında təqdimatı baş tutmuşdu. Sonra iştirakçılar yeni güzgüsüz kameraların iş prinsipi ilə tanış olmuş, fotoşəkillər üzərində yeni funksiyaları yoxlamışdılar.
Canon şirkəti ustad dərsində fəal iştirakına və fərqləndiyinə görə Xəzər Universitetinin iki tələbəsinə hədiyyə vermişdi.