Xəzər Universitetinin əməkdaşları 2022-ci il aprel ayının 20-də “Horizon Avropa” Proqramı çərçivəsində maliyyələşdirilərək icra olunan “Miqrant agentliyi üçün tarixlərin və arxivlərin əlaqələndirilməsi: Avropa və Aralıq dənizi regionu üzrə qarışıq təsvirlər” adlı layihənin seminarında iştirak ediblər. AMEA-nın Coğrafiya İnstitutunda keçirilən seminar “Miqrasiya problemlərinə yeni baxış: COVID-19 pandemiyasından əvvəl və sonra” mövzusunda olmuşdur. Tədbirdə digər universitetlərin akademik heyəti, alim və mütəxəssislər, miqrasiya sahəsində maraqlı olan qurumların nümayəndələri, o cümlədən Beynəlxalq Miqrasiya Təşkilatının Azərbaycan Nümayəndəliyinin eksperti Yuliya Rıjix iştirak etdilər.

Tədbirə moderatorluq edən, layihənin əlaqələndiricisi, Xəzər Universitetinin Coğrafiya və ətraf mühit departamentinin müəllimi Rövşən Kərimov beynəlxalq miqrasiyada müşahidə olunan meyillər, miqrasiyaya səbəb olan amillər, xüsusən COVID-19 pandemiyasının təsiri mövzusunda çıxış etdi. Coğrafiya və ətraf mühit departamentinin müdiri, layihənin icraçısı Rövşən Abbasov ölkə ərazisində kənddən şəhərə miqrasiyaya, bu prosesdə ekoloji amillərin təsirinə dair fikirlərini bölüşdü. Xəzər Universitetinin İqtisadiyyat və menecment departamentinin və Miqrasiya Araşdırmaları Mərkəzinin rəhbəri Ceyhun Məmmədov isə iqtisadiyyatın diversifikasiyası ilə miqrasiya arasındakı asılılığa dair apardığı araşdırmanın nəticələrini təqdim etdi.