2022-ci il aprelin 8-də Xəzər Universiteti “Dünya” məktəbində təsis edilən Nailə xanım İsayeva muzeyində tədbir keçirildi.

Tədbirdə Xəzər Universiteti və “Dünya” məktəbinin rəhbərliyi, əməkdaşları, ölkənin tanınmış ziyalıları – ictimai xadimlər, alimlər, yazıçılar, şairlər, müğənnilər iştirak edirdilər.

Universitetin Kamera orkestrinin Nailə xanım İsayevanın musiqi əsərlərinin ifası ilə açılan tədbirdə İdarəetmə və tələbə işləri üzrə prorektor İsaxan İsaxanlı qonaqları salamlayaraq, Nailə xanım İsayevanın xatirəsini əbədiləşdirmək üçün yaradılan muzey və gələcəkdə görüləcək işlər haqqında onlara ətraflı məlumat verdi. O qeyd etdi ki, Xəzər Universiteti “Dünya” məktəbi nəzdində olan muzey təhsil sahəsində zəngin təcrübəsi, böyük əməyi, həmçinin musiqi bəstələri ilə tanınan Nailə xanım İsayevanın həyatını və ictimai fəaliyyətini xronoloji baxımdan əks etdirməklə yanaşı, Azərbaycanın tarixində iz qoyan, istər elm, təhsil, mədəniyyət, incəsənət sahəsində, istərsə də adı qəhrəmanlıq dastanlarında, bədii əsərlərdə məşhurlaşan qadınların xatirəsini əbədiləşdirmək, onları təbliğ etmək kimi təqdirəlayiq bir ideyanın daşıyıcısıdır.

Muzeyin tərtibçi-dizayneri, Xəzər Universitetinin Dekorativ-Tətbiqi Sənət Muzeyinin direktoru, xalçaçı rəssam Afaq Kərimova muzeyin quruluşu və tərtibi haqqında qonaqlara məlumat verdi, onları Nailə xanım İsayevanın həyatını, fəaliyyətini, şəxsi geyim və əşyalarını əks etdirən stendlərlə,yaradıcılığının 8 incisi olan musiqiləri, mahnıları not və illüstrasiya formasında göstərən böyük həcmli musiqi vitrini ilə tanış etdi.

Muzeyi ziyarət edən qonaqlardan Xalq şairi Ramiz Rövşən, xalq artistləri Xuraman Qasımova, Yeganə Axundova, Fidan Hacıyeva və tarixçi-alim Solmaz Tohidi Nailə xanım haqqında xatirələrini bölüşdülər.

Tədbirin sonunda “Nailə xanım İsayeva xatirələrdə” kitabı qonaqlara hədiyyə olundu.