2022-ci il martın 15-də “Dünya” məktəbində Xəzər Universitetinin tərəfdaş olduğu Britaniya Konsulluğunun Yaradıcı Komissiyalar Proqramı tərəfindən dəstəklənən Assuming Responsibility for Climate Change (arCc) layihəsi çərşivəsində "İqlim Dəyişikliyinə Dair Məsuliyyət" adlı yekun konfransı keçirildi.
Konfrans Xəzər Universiteti İnkişaf Mərkəzinin rəhbəri Raziyə İsayevanın giriş sözü ilə başladı.O, iştirakçıları və qonaq natiqləri salamladı. Raziyə İsayeva layihə və bu layihə çərçivəsində indiyədək təşkil olunmuş konfranslar haqqında məlumat verdi.
Sonra Böyük Britaniyanın Azərbaycandakı səfirliyinin missiya rəhbərinin müavini Emma Robinson iqlim dəyişikliyi, onun yaratdığı fəsadlar haqqında danışdı. O, hər kəsi fərd olaraq təbiəti, planeti qorumağa çağırdı.
Konfransda Britaniya Konsulluğunun Azərbaycandakı direktor müavini Nigar Bəyimova, Xəzər Universiteti Coğrafiya və ətraf mühit departamentinin müdiri Rövşən Abbasov, Ernst and Young İqlim Dəyişiklikləri və Davamlılıq Xidmətinin nümayəndəsi Ceyhun Hacıyev, Dayanıqlı İnkişaf Məqsədləri üzrə gənc səfir Gülsarə Qasımova qonaq natiq qismində çıxış etdilər. Onlar iqlim dəyişikliyi və onun nəticələri haqqında təqdimat edərək, müxtəlif həll yollarından danışdılar. Daha sonra sual-cavab sessiyası baş tutdu.
Konfransın 2-ci hissəsi layihə çərçivəsində təşkil olunmuş yarışmaya həsr olundu. Xəzər Universiteti, “Dünya” məktəbi və 132-134 nömrəli təhsil kompleksinin tələbələri 1 dəqiqəlik çıxış edərək, posterlərini təqdim etdilər. Sonda ilk 3 yeri tutanlar münsiflər heyəti tərəfindən mükafatlandırıldı.
Qeyd edək ki, 13 ölkə və 3 qitəni əhatə edən layihə həyat tərzinin iqlim dəyişikliyi üzərindəki təsirini əks etdirmək, fərdi məsuliyyəti və onun vacibliyini anlamaq, yerli səviyyədə məlumatlandırma vasitələrilə (vebinarlar, tədbirlər, müsabiqələr) hərəkətə keçmək üçün fərdin məsuliyyətini dərk etməyinin yollarını müəyyənləşdirməyə kömək etmək məqsədilə həyata keçirilir.