2022-ci il martın 4-də Xəzər Universitetinin təşkilatçılığı ilə Potensial Məktəb Direktorları kursunun müdavimlərinin “Dünya” Məktəbinin direktor və müəllim heyəti ilə görüşü keçirildi.
Görüşdə “Dünya” məktəbinin direktoru və kursun məzunu olmuş Nazpəri Bayramova məktəbin inkişaf yolundan, əldə etdiyi uğurlardan, təhsil sistemində istifadə etdikləri metod və üsullardan, şagirdlərin fəallığından və məktəbin 20 illik təcrübəsindən danışdı. Müdavimlər ilə diskussiya təşkil olundu və suallara cavab verildi. Onlar sinif otaqları, laboratoriyalar, şagirdlərin əl işləri olan guşələrlə tanış oldular.
Görüş çay süfrəsi ətrafında davam etdi. Təhsil, təhsilin idarə olunması və məktəblərdəki problemlər, onların həll yolları mövzusunda müzakirələr aparıldı.
Qeyd edək ki, 2022-ci il yanvarın 10-dan Xəzər Universitetinin təşkilatçılığı ilə Potensial Məktəb direktorları kursunun növbəti təlimləri keçirilir. Kurs müddətində təhsilin idarə olunması, maliyyə, statistika, qanunvericilik, təhsil hüququ, məntiq və IKT fənləri üzrə təlimlər keçirilməkdədir.
Potensial məktəb direktorları kursu 2014-cü ildən fəaliyyətə başlamış və bir çox məzunları direktor, direktor müavini təyin olunmuşdur..