Erasmus+ semestrini mübadilə proqramı ilə İtaliyanın Turin Politexnik Universitetində keçirmiş Xəzər Universitetinin tələbəsi Xəyal Əliyev təəssüratlarını bölüşür.

Pandemiya zamanı mən yeni bir macəra üçün vətənimdən 4000 km uzaqlaşmağa qərar verdim. Bütün bu post-kovid depressiya və narahatlıq ilə bu qərarı vermək olduqca çətin idi. Ancaq İtaliya buna tamamilə dəyər!

İxtisasım İnşaat mühəndisliyidir. Amma çox təəssüf ki, Azərbaycanda mühəndisliyin bu sahəsinə üstünlük verənlər və bu sahədə öz bacarıqlarını xaricdə təkmilləşdirənlər çox deyil. Beləliklə, İtaliyadan daha yaxşı seçim hara ola bilər?! Hər şəhərin heyrətamiz tarixi, mistik rəsmləri, heykəlləri və abidələri olan ölkə. Bir inşaat mühəndisi kimi İtaliyadakı binaların dizaynını müşahidə edərkən, heyrətlənməmək mümkün deyil.

Uzun sözün qısası, dünyanın ən yaxşı mühəndislik universitetlərindən biri olan Politecnico di Torino-da təhsil almaq fürsəti əldə etdim. Bu, İtaliyanın ən qədim texniki universitetidir. 1859-cu ildə qurulan bir universitet təsəvvür edin! Erasmus yeni məkan kəşf edib! Tələbələrin demək olar ki, əlli faizi dünyanın müxtəlif yerlərindəndir. Bu o deməkdir ki, siz tamamilə fərqli yerlərdən olan insanlarla dostluq edə bilərsiniz. Məsələn, mən argentinalı Julietta, Livandan Mustafa, İtaliyadan Martina, Braziliyadan Henrique ilə həqiqətən çox yaxşı vaxt keçirirdim. Onların mətbəxini dadmaq, müxtəlif mədəniyyətləri və saya bilməyəcəyim bir çox şeyləri tanımaq şansım oldu!

Mübadilə tələbəsi olduğum şəhər- Turin sənaye (və futbol) şəhəridir. Həm də İtaliyanın ilk kralının doğulduğu şəhərdir. Əgər siz müasir incəsənət adamısınızsa, onun unikal mədəniyyət küçələrindən və memarlıq baxımından maraqlı binalarından həzz ala bilərsiniz. Əksər səyahətçilər Roma-Florensiya-Venesiyaya üz tuturlar, lakin görünür Turini turistlər hələ kəşf etməyib. Erasmus proqramı ilə bütün sənət şəhərlərini, hətta getmək istədiyim ölkələri gəzmək və onlardakı bütün gözəllikləri kəşf etmək imkanım oldu.