Xəzər Universitetinin 3-cü kurs tələbəsi (Kompüter mühəndisliyi ixtisası) Erasmus+ Tələbə Mübadilə Proqramında iştirakı barədə təcrübəsini bölüşür.

Ciao! Salam!

Mən Almaz Cəfərova, Roma Sapienza Universitetində mübadilə tələbəsiyəm. Mübadilə təcrübəmi sizinlə bölüşməkdən çox məmnunam!

Mənim mübadilə dövrüm 2021-2022 qış semestrini əhatə edir (2021-ci ilin sentyabrından 2022-ci ilin fevralına qədər). Dünyanın ən yaxşı reytinqli universitetlərindən birində təhsil almaq şansım oldu. Sapienza Universiteti Avropanın ən böyük universitetlərindəndir. Təhsil sistemi Xəzər Universiteti ilə eyni olmasa da, uyğunlaşmaq asandır. İtaliyada beynəlxalq tələbə olaraq təhsil almaq, ən azı, unudulmaz bir təcrübə oldu. Sapienza`da dünyanın hər yerindən çoxlu tələbə var. Beləliklə, bir-birimizlə danışmaq, müxtəlif mövzuları müzakirə etmək və bir-birimizə kömək etmək imkanımız oldu.

Biz şanslıyıq ki, Sapienza beynəlxalq tələbələrin yeni insanlarla tanış olması və əsl mədəniyyətlərarası mübadilə etməsi üçün şərait yaradır. Xüsusilə, semestrin ilk iki həftəsi “Xoş gəlmisiniz həftəsi” idi və hər gün müxtəlif fəaliyyət növləri, yəni şəhər turları, pikniklər təşkil olunurdu. Müxtəlif millətlərdən olan çoxlu insanlarla tanış oldum. Onların vətənini, mədəniyyətini öyrənmək imkanım oldu və mən də öz ölkəm Azərbaycan haqqında xoş təəssürat yaratmaq üçün əlimdən gələni edirdim.

Roma tarixi bir şəhərdir. Kolizey, Trevi Fəvvarəsi, Roma Forumu və s. haqqında hamımız bilirik, lakin orada daha çox görməli yer var. Romanın küçələri gözəldir və hətta təsadüfi yerlərdə belə tarixi görə bilərsiniz. Hər yerdə hər şey tarixi cəhətdən qiymətlidir. Sapienza`nın bizim üçün təşkil etdiyi pulsuz şəhər turları şəhər haqqında daha çox məlumat əldə etməyimizə kömək etdi.

İtalyanlar əsasən şən və mehribandırlar. Ən böyük çətinliyim ünsiyyət idi, çünki yerli insanlar, adətən, ingilis dilini bilmirlər. Ancaq belə hallarda da sizə kömək etmək üçün bir yol tapmağa çalışırlar. Romada mübadilə etmək istəyən tələbələr təqaüd və yaşayış xərcləri barədə narahat olmamalıdırlar. Təqaüd şəhərdən zövq almaq və hətta səyahət etmək üçün kifayətdir. Amma nəzərə alınmalıdırlar ki, biz hər ay təqaüdümüzü almırıq. Ümumi təqaüdün 50%-ni bank hesablarımız hazır olanda almışıq, 30%-i üçüncü ayda verilib, 20%-i isə yola düşməyimizə bir həftə qalmış köçürüləcək.

Qısa müddət ərzində çoxlu xatirələr və təcrübələr qazandım. Komfort zonamı tərk etmək və gözəl bir səyahət etmək imkanım oldu. Mən bütün tələbələrə bu təcrübədən keçməyi tövsiyə edirəm.