2021-ci il dekabrın 26-28-də Naxçıvan Universitetində Xəzər Universitetinin tərəfdaş olduğu Erasmus+ ECAR layihəsinin növbəti görüşü keçirildi. Tədbirin məqsədi indiyə qədər layihə çərçivəsində əldə olunan nəzəri nəticələrin müzakirəsi, qiymətləndirilməsi və gələcək fəaliyyətinin planlaşdırılması idi.

Naxçıvan Universiteti, Naxçıvan Dövlət Universiteti və Naxçıvan Müəllimlər İnstitutu rektorlarının, Milli Erasmus Ofisinin rəhbərinin, Bakı Biznes Universiteti, Azərbaycan Dövlət Pedaqoji Universiteti, Bakı Mühəndislik Universiteti, Bakı Ali Neft Məktəbi, Azərbaycan  Dövlət Mədəniyyət və İncəsənət Universiteti və Odlar Yurdu Universiteti prorektorlarının  iştirakı ilə keçən tədbirdə Xəzər Universitetini elmi işlər üzrə prorektor Səidə Şərifova təmsil edirdi.

Görüşdə Milli Erasmus Ofisinin rəhbəri Pərviz Bağırov Erasmus+ çərçivəsində həyata keçirilən Rektorlar Konfransı barəsində beynəlxalq təcrübəni bölüşdü.

Bakı Biznes Universitetinin Beynəlxalq əlaqələr üzrə prorektoru Eşqin Bayramov çıxışında layihənin ümumi məqsədi, hədəfləri, iş planları, eləcə də yerli və xarici tərəfdaşları barəsində məlumat verdi. Həmin universitetin Universitet-sənaye əməkdaşlığı departamentinin direktoru, layihənin koordinatoru Gülşən Bayramova Azərbaycan ali təhsil müəssisələrində əməkdaşlıq, əlaqə və şəbəkələşmə sahəsində aparılmış tədqiqatın nəticələrinə dair hesabatla çıxış etdi.

Digər universitetlərin prorektorları da çıxış edərək, yeni çağırışların müşahidə olunduğu müasir təhsil sistemində universitetlərin daha sıx əməkdaşlığının zəruriliyini və layihənin bu istiqamətdə müsbət nəticələr verəcəyinə əminliklərini vurğulayıblar.