2021-ci il dekabrın 22-də Azərbaycan Dillər Universitetinin nəzdində elmlər doktoru və fəlsəfə doktoru elmi dərəcəsi verən ED 2.12 Dissertasiya şurasında Xəzər Universitetinin dissertantı və İngilis dili və ədəbiyyatı departamentinin koordinatoru Milana Abbasova “İngilis dilinin tədqiqinə sosiolinqvistik yanaşmada müasir tendensiyalar” adlı dissertasiya işini uğurla müdafiə etdi.
Dissertasiya şurasının sədri akademik Kamal Abdullayevin rəhbərliyi ilə keçirilən iclasda Milana Abbasovanın təqdimatından sonra şura üzvlərinin sualları cavablandırıldı.
Dissertasiya şurası rəsmi opponentlərin, ayrı-ayrı alimlərin dissertasiya və onun avtoreferatı haqqında rəylərini, elmi iş üzrə yerli və xarici elmi jurnallarda çap olunmuş məqalələri, dissertasiya işinin Azərbaycan Respublikasının Prezidenti yanında Ali Attestasiya Komissiyasının tələblərinə cavab verdiyini nəzərə alaraq, iddiaçının fəlsəfə doktoru elmi dərəcəsi almağa layiq olması haqqında qərar qəbul etdi.