2021-ci il mayın 13-də Xəzər Universitetinin tərəfdaş olduğu Erasmus+ UniLab layihəsi çərçivəsində tərəfdaş universitetlərin növbəti virtual görüşü keçirilmişdir. Görüşü açan layihə koordinatoru Carme Royo gündəlikdə duran məsələləri iştirakçılara təqdim etdi. Bundan sonra layihə çərçivəsində 2021-ci ilin oktyabr ayına qədər görüləcək işlər müzakirə edildi.
Görüşdə müzakirə olunan əsas məsələlərdən biri layihədə indiyə qədər görülmüş işlərin hesabatının hazırlanaraq Avropa Komissiyasına göndərilməsi oldu. Tərəfdaş universitetlərə hesabatları vaxtında təqdim etmək tövsiyə edildi. Bundan sonra layihənin keyfiyyyətini ölçmək üçün hazırlanmış sorğuların linki iştirakçılara təqdim edildi və ən qısa zamanda həmin sorğuların doldurulması tapşırıldı.
Sibir Federativ Universitetinin hazırladığı universitet-sənaye əməkdaşlığı modeli görüş iştirakçılarına təqdim olundu. Təqdim olunan modelin tərəfdaş universitetlərin müvafiq departamentlərinin müzakirəsinə çıxarılması və hər bir universitetin bu model haqqındakı fikirlərinin bildirilməsi qərara alındı.
Görüşdə həmçinin layihə çərçivəsində nəzərdə tutulmuş tələbə portalının ilkin versiyası haqqında iştirakçılara məlumat verilmiş və portal haqqında verilən suallar cavablandırılmışdır.
UniLab layihəsinin virtual görüşündə Xəzər Universiteti Təlim və Tədris Mərkəzinin direktoru Ülkər Bayramova tərəfindən təmsil olunmuşdur.