2020-ci il yanvarın 16-da Xəzər Universitetinin Mərmər salonunda CBELT (İngilis Dili Müəllimlərinin Bacarıqlarının Gücləndirilməsi) layihəsinin Bakı və Sumqayıt şəhərlərinin məcburi köçkün məktəblərindən 200 müəllim üçün açılış mərasimi keçirildi.

Xəzər Universitetinin İnkişaf mərkəzinin direktoru Raziyə İsayeva tədbiri açaraq, Amerika səfirliyi tərəfindən dəstəklənən, 200 müəllim və 12000-dən çox məcburi köçkün tələbəsinə ingilis dili bacarıqlarını artırmaqda kömək etmək üçün nəzərdə tutulan CBELT layihəsi haqqında geniş məlumat verdi.

Universitetin rektoru dosent İradə Xəlilova, universitetin təsisçisi, Direktorlar və Qəyyumlar Şurasının sədri professor Hamlet İsaxanlı, ABŞ-ın Azərbaycandakı səfirliyinin Mədəni işlər üzrə mütəxəssisi Riçard Pinkham, İngilis dili və ədəbiyyatı departamentinin müdiri Dr. Bahman Amani təbrik nitqləri söylədilər.

Çıxışlardan sonra Xəzər Universitetinin İngilis dili və ədəbiyyatı departamentinin əməkdaşlarından on nəfər təcrübəli və əvvəllər təlim görmüş müəllimin məcburi köçkün məktəblərindən olan müəllimlər üçün təlim keçirəcəkləri qeyd edildi.

Təlim sessiyaları üç əsas moduldan ibarətdir: Modul 1: Dil öyrənilməsi və tədrisinin əsası; Modul 2: Dərsin planlaşdırılması və dil tədrisi üçün mənbələrdən istifadə; Modul 3: Tədris və təlim prosesinin idarə olunması. Bu sessiyaların əsas məqsədlərindən biri də məktəblərdəki ingilis dili müəllimlərinin peşəkarlığını inkişaf etdirmək, tədris bacarıqlarını artırmaq üçün onlara yeni strategiyalar, metodlar və fəaliyyətlərin öyrədilməsidir.

Mərasimin sonunda məcburi köçkün məktəblərindən gələn müəllimlər təlimlərə başlamaq məqsədilə qruplara bölünmək üçün test sınağından keçdilər. Təlim dərsləri üç ay ərzində həftədə iki dəfə planlaşdırılmış vaxtda keçiriləcəkdir. Proqramı başa vurduqdan sonra iştirakçılara sertifikat veriləcəkdir.