Özbəkistanın qədim elm və mədəniyyət mərkəzi olan Buxara şəhərində Türk dünyasının ortaq mənəvi irsinə və vəqf ənənələrinə həsr olunmuş mötəbər elmi toplantı təşkil olunacaq. 2026-cı il aprelin 6-da Beynəlxalq Buxara Dövlət Universitetinin ev sahibliyi ilə “I beynəlxalq Türk dünyasında ortaq dəyərlərin ehyası, inşası və Türk-islam vəqf mədəniyyəti simpoziumu” öz işinə başlayacaq. Tədbir Türk dünyasının nüfuzlu elm və təhsil ocaqlarının sıx əməkdaşlığı çərçivəsində reallaşdırılır.

Simpoziumun əsas təşkilatçısı Türkiyənin Qafqaz Universitetinin Əbül-Həsən Xaraqani adına araşdırma Mərkəzidir. Beynəlxalq tərəfdaşlar qismində isə Özbəkistanın Beynəlxalq Buxara Dövlət Universiteti və Azərbaycandan Xəzər Universitetinin Mövlana Ədəbi-Fəlsəfi Araşdırmalar İnstitutu çıxış edir.

Simpoziumun fəxri şurasında Xəzər Universitetinin təsisçisi, Direktorlar və Qəyyumlar Şurasının sədri, professor Hamlet İsaxanlı, Qafqaz Universitetinin rektoru, professor Hüsnü Kapu və Beynəlxalq Buxara Dövlət Universitetinin rektoru, professor Şərif Baratov təmsil olunurlar.

Konfransın fundamental məqsədi Türk-İslam mədəniyyətinin ən köklü təsisatlarından olan vəqf ənənəsini, ortaq mənəvi dəyərləri və mədəni kodları müasir elmi yanaşmalar işığında tədqiq və müzakirə etməkdir. Tədbirdə Türkiyə, Azərbaycan, Özbəkistan, Pakistan, İngiltərə və Qazaxıstandan 44 məruzəçi iştirak edəcək.

Simpoziumda Xəzər Universitetini Mövlana Ədəbi-Fəlsəfi Tədqiqatlar İnstitutunun koordinatoru dr.Fəridə Seyidova təmsil edəcək.