2020-ci il sentyabrın 12-si saat 10:00-da Xəzər Universitetinin İngilis dili və ədəbiyyatı departamenti onlayn şəkildə –“Microsoft Teams” platforması vasitəsilə Dil, Ədəbiyyat və Dilçilik fəlsəfəsi üzrə Beynəlxalq Konfrans (ICPL 2020) keçirəcək. İlkin olaraq, konfransın 2020-ci il martın 12-si və 13-də keçirilməsi nəzərdə tutulmuşdu. Lakin Covid-19 virusunun yayılması səbəbindən, digər dünya səviyyəsində təşkil olunan konfranslar kimi, İCPL 2020 təxirə salındı və sonrakı tarixlərdə konfransın onlayn qaydada keçirilməsi üçün müəyyən planlar hazırlandı.

Konfransda Azərbaycan, Rusiya, Braziliya, Rumıniya, Bolqarıstan, Ukrayna, İran, Pakistan, Birləşmiş Ştatlar, İraq, Nigeriya, Oman, Gürcüstan, Yaponiya, Finlandiya, Səudiyyə Ərəbistanı da daxil olmaqla, müxtəlif ölkə və universitetlərin təmsilçiləri iştirak edəcəklər. Təqdimatçılar tərəfindən təqdim olunan tədqiqat mövzuları və sahələri olduqca genişdir, maraqlanan tələbə və işçi heyətinin bu müxtəlif təqdimatlardan iştirak edərək yararlanması tövsiyə olunur.

Onlayn konfrans bir gün davam edəcək. Qeyd edək ki, açılış hissəsində Xəzər Universitetinin konfransla maraqlanan istənilən tələbə və həmkarı iştirak edə bilər. Konfrans hər biri 7 paneldən ibarət olmaqla, 2 sessiya şəklində keçiriləcək; hər bir panel isə Xəzər Universitetinin heyəti sırasından seçilmiş sədrlə müşayiət olunan 5 təqdimatı özündə əks etdirəcək.

Konfransın proqramı bu linkdə verilmişdir.