Məvaciblərin hesablamasında ədalət prinsipinin tətbiqi üzrə simulyasiya 

Erasmus+ Jean Monnet Module layihəsi çərçivəsində tədris olunan fənnin tələbələri Avropa Komissiyası tərəfindən Avropa Parlamenti və Avropa Nazirlər Şurasına təsdiq olunması üçün təqdim edilən “Məvaciblərin hesablamasında ədalət prinsipinin tətbiqi” direktivinin simulyasiyasını həyata keçirmişdir. 

Avropa Komissiyasının direktiv layihəsi ilə tanış olan tələbələr əvvəlcə Avropa Parlamentinin siyasi qruplarına bölünmüş, öz qrupunun ideologiyasına və siyasi marağına uyğun mövqe sənədi hazırlamışdır. Mövqe sənədlərinin təqdim edilməsindən sonra tələbələr Avropa Parlamentinin birinci oxunuşunun müzakirəsini simulyasiya edərək, heç bir düzəliş etmədən direktivi qəbul etmişdir. 

Avropa Parlamentinin müzakirəsindən sonra tələbələr direktivin müzakirəsi ilə bağlı Aİ Nazirlər Şuranın iclasını simulyasiya etmişdir. Üzv dövlətlərin nazirlərinin görüşünü simulyasiya edən tələbələr, üzv dövlətlərin də real vaxt mövqeyinə uyğun gələn direktiv üzərində qızğın müzakirələr aparmışdır. Fransanın sədrliyi ilə keçirilən Aİ Nazirlər Şurasının iclası təqdim edilən direktivi kiçik düzəlişlərlə qəbul etmişdir. 

Beləliklə, Avropa Parlamenti ikinci moxunuşda direktivi qəbul etmişdir. 

Şəkillər üçün bura klikləyin. 

Xəzər Universiteti Avropa İttifaqı Şurasının miqrasiya böhranına həsr edilmiş görüşünün simulyasiyasını təşkil etmişdir 

2022-ci il dekabrın 13-də Xəzər Universitetinin Siyasi elmlər və fəlsəfə departamentinin təşkilatçılığı ilə Avropa İttifaqı Şurasının miqrasiya böhranına həsr edilmiş simulyasiya oyunu təşkil edilmişdir. 

Erasmus+ Jean Monnet Module layihəsi çərçivəsində baş tutan simulyasiya oyunlarında Azərbaycanın 6 müxtəlif ali təhsil müəssisəsində və eləcə də 2 xarici ali təhsil müəssisəsində təhsil alan tələbələr iştirak etmişdir. 

Simulyasiya oyunundan öncə Jean Monnet layihəsinin akademik koordinatorları Dr. Elmar Mustafayev və Zibər Hüseynova tərəfindən iştirakçılar Avropa İttifaqı və institutlarının səlahiyyətləri barəsində təlimatlandırılmış, üzv-dövlətlərin dövlət və ya hökumət başçıları və Aİ Şurasının Prezidenti rollarına bölünmüşdür. Eyni zamanda, rollara ayrılmış tələbələrin qarşısında müvafiq olaraq təmsil etdikləri ölkələrin milli maraqları, hakim siyasi partiya və ya koalisiya hökümətinin siyasi ideologiyası, eləcə də ümumavropa maraqlarının dərindən araşdırılması tapşırığı qoyulmuşdur. 

Avropa İttifaqı üzv dövlətlərinin dövlət və hökümət başçılarının görüşünü simulyasiya edən tələbələr sonda konsensusa gələ bilməsələr də, xarci sərhədlərin gücləndirilməsi üzrə davamlı müzakirələrin təşkil edilməsinə dair razılıq əldə edilmişdir. 

Şəkillər üçün bura klikləyin. 

Erasmus+ Jean Monnet Module layihəsi çərçivəsində tələbələr COVİD-19 pandemiyası ilə mübarizədə Avropa İttifaqının gördüyü tədbirlərin simulyasiyasını təşkil etmişdir 

Avropa İttifaqının simulyasiya oyunları ilə tədrisi kursunun (PSIR 477) tələbələri İttifaqın COVİD-19 pandemiyası ilə mübarizə tədbirlərinin müzakirəsini təşkil etmişdir. Erasmus+ Jean Monnet Module layihəsi çərçivəsində baş tutan fənnin izləyiciləri ilk öncə Avropa İttifaqı haqqında nəzəri biliklərə yiyələnmiş, daha sonra isə Avropa Komissiyasının Koronavirusla Mübarizə alt-qrupunda təmsil olunmaları üçün 5 komandaya bölünmüş, müvafiq olaraq istiqmətlər (böhranın idarə edilməsi; səhiyyə sahəsində problemlər; sərhədlə bağlı məsələlər; mobillik; və makroiqtisadi məsələlər) üzrə təklif paketləri hazırlanması istənilmişdir. 

Avropa Komissiyasının Koronavirusla Mübarizə alt-qrupu tərəfindən hazırlanan təklifin müzakirəsindən sonra tələbələr COVID-19 pandemiyası ilə mübarizə tədbirlərini Avropa İttifaqı Şurasında müzakirə etmişdir. 

Aİ-nin dövlət və hökumət başçılarının online görüşü pandemiya ilə mübarizə tədbirləri çərçibəsində İqtisadi Bərpa Fondunun yaradılması ətrafında qızğn müzakirələrə şahid olmuşdur. Belə ki, cənubi Avropa dövlətləri pandemiyadan daha çox əziyyət çəkmələri səbəbindən sərhədlərin turist səfələri üçün açılmasını istəsə də, Avstriya, İsveç, Danimarka, Niderland kimi dövlətlər sərhədlərin açılmasına etiraz etmişdir. Eyni zamanda bu dövlətlər cənubi Avropa dövlətlərinin gələcəkdə borcların ortaq şəkildə ödnişi təklifini də rədd etmiş, Macarıstan və Polşada demokratik vəziyyətin pisləşməsindən narahatçılıqlarını ifadə etmişdilər. 

Öz növbəsində Polşa və Macarıstan liderləri Aİ-nin digər üzv dövlətlərinin COVID-19 pandemiyası zamanı bu ölkələrdə demokratik prinsiplərin pisləşməsi ilə bağlı ittihamlarını rədd edərək çoxillik maliyyə çərçivəsində daha çox vəsait ayrılmasına çağırış etdi. 

Aİ liderlərini simulyasiya edən tələbələr İqtisadi Dəstək Paketi ilə bağlı razılığa gələ bilməsələr də, istiqamət üzrə danışıqların davam etdirilməli olduğuna dair həmfikir olmuşdur. 

Növbəti mərhələ olaraq kursu izləyən tələbələr Avropa Parlamentinin Plenar iclasını simulyasiya edərək və Avropa Komissiyasının yuxarıda qeyd olunan 5 siyasət sahəsi üzrə tövsiyələrini müzakirə etmişdir. 

Şəkillər üçün bura klikləyin.