29 oktyabr 2026-cı il tarixində Xəzər Universitetinin Bakıxanov filialında “TechConnect Week’26” tədbir həftəsi çərçivəsində Yusifli Tech şirkətinin nümayəndələrinin tələbələr üçün çıxışı keçiriləcək.

“TechConnect Week’26” süni intellekt və müasir texnologiyalara həsr olunmuş tədbir həftəsidir. Həftə çərçivəsində 10-dan çox universitetdən 1000-dən artıq iştirakçının bir araya gəlməsi, süni intellektin biznes, texnologiya, kibertəhlükəsizlik və gələcəyin iş dünyasına təsirinin müzakirə olunması nəzərdə tutulur.

Xəzər Universitetində keçiriləcək çıxış “AI istifadəçisindən AI mühəndisinə: Müasir AI sistemlərinin arxitekturasını necə qururuq?” və “AI dövründə developer olmaq: Gələcəyin mühəndisi hansı bacarıqlara sahib olmalıdır?” mövzularını əhatə edəcək. Çıxış zamanı tələbələrə süni intellekt sahəsindəki aktual mövzular, real nümunələr və gələcək karyera imkanları barədə məlumat veriləcək.

Tədbir əsasən kompüter elmləri, informasiya texnologiyaları və mühəndislik ixtisasları üzrə təhsil alan tələbələr üçün nəzərdə tutulub.