28 oktyabr 2026-cı il tarixində Xəzər Universitetində İnnovasiya və Rəqəmsal İnkişaf Agentliyinin təşəbbüsü ilə fəaliyyət göstərən Azərbaycan Kibertəhlükəsizlik Mərkəzinin (AKM) 9-cu dalğa üzrə infosessiyası keçiriləcək.

İnfosessiyada AKM-in qrup rəhbəri Gülnar Mirhüseynova, mütəxəssis və layihə koordinatoru Adilə Bəhməni Əliyeva, aparıcı mütəxəssis və CyberPark komandasının rəhbəri Müzəffər Mikayılov, eləcə də aparıcı mütəxəssis və icma meneceri Mübariz İmanov çıxış edəcəklər.

Tədbirdə tələbələrə AKM proqramının məqsədi, qəbul və seçim qaydaları, tədris prosesi, təqaüd və məşğulluq imkanları, eləcə də məzunların karyera istiqamətləri barədə məlumat veriləcək. Qeyd edək ki, AKM-də tədris Technion-un müəllim heyəti tərəfindən ingilis dilində aparılır, müsahibədən uğurla keçən namizədlər isə 100% təqaüd qazanır.

İnfosessiya universitetin bakalavr və magistr tələbələri, xüsusilə informasiya təhlükəsizliyi, informasiya texnologiyaları, kompüter elmləri, tətbiqi riyaziyyat, fizika və kibernetika ixtisasları üzrə təhsil alan tələbələr üçün nəzərdə tutulub.