Elm və Ali Təhsil üzrə Dövlət Agentliyi və Clarivate şirkətinin təşəbbüsü ilə 05 oktyabr tarixindən etibarən Bakıda seçilmiş ali təhsil müəssisələrində “Clarivate Günləri” çərçivəsində təlimlərin keçirilməsi nəzərdə tutulub.

Bu çərçivədə 08 oktyabr 2026-cı il tarixində saat 10:30-da Xəzər Universitetinin Kitabxana-İnformasiya Mərkəzinin təşkilatçılığı ilə təlim keçiriləcək. Neftçilər Kampusunda, 102N nömrəli otaqda baş tutacaq tədbirdə Clarivate şirkətinin əməkdaşları Handan İliç və Xəyalə Hacıyeva tərəfindən müxtəlif elmi informasiya resursları və müasir tədqiqat alətləri haqqında təqdimatlar keçiriləcək.

Təlim zamanı iştirakçılara Milli Müqavilə çərçivəsində təqdim olunan “ProQuest Central” və “Web of Science” platformaları haqqında ətraflı məlumat veriləcək. Həmçinin bu resurslardan elmi-tədqiqat fəaliyyətində səmərəli və effektiv istifadə imkanları, məlumatların axtarışı və təhlili, elmi araşdırmaların dəstəklənməsi və tədqiqat prosesinin daha səmərəli təşkili ilə bağlı praktiki yanaşmalar təqdim olunacaq.

Tədbirdə, eyni zamanda, Süni İntellekt həlləri və “Web of Science Research Intelligence” platformasının imkanları haqqında məlumat veriləcək. İştirakçılar müasir analitik alətlərin tədqiqat fəaliyyətində, elmi nəticələrin qiymətləndirilməsində və tədqiqat strategiyasının formalaşdırılmasında tətbiqi ilə bağlı yeni imkanlarla tanış olacaqlar.

Təlimin əsas məqsədi Xəzər Universitetinin akademik heyətinin beynəlxalq elmi informasiya resurslarından və müasir analitik alətlərdən daha səmərəli istifadəsini dəstəkləmək, tədqiqat fəaliyyətinin keyfiyyətinin və effektivliyinin artırılmasına töhfə verməkdir.