Dr. Çiçək Əliyeva

Dekan

01.05.2025-ci il tarixində Xəzər Universiteti ilə Hasvet A.Ş. arasında əməkdaşlıq protokolu imzalanmış və bu əməkdaşlıq çərçivəsində Xəzər Universiteti Hasvet Baytarlıq Fakültəsi fəaliyyətə başlamışdır. Bu əməkdaşlıq çərçivəsində yaradılan fakültə müasir baytarlıq təhsilinin tələblərinə cavab verən, nəzəri biliklərlə təcrübi hazırlığı və elmi-tədqiqat fəaliyyətlərinin inteqrasiyasını hədəfləyir. Fakültənin əsas məqsədi baytarlıq təbabəti sahəsində yüksək ixtisaslı, peşəkar və beynəlxalq standartlara uyğun bilik və bacarıqlara malik mütəxəssislərin hazırlanmasıdır.

Fakültə müasir tədris və klinik infrastruktura malik olmaqla tələbələrin praktik hazırlığının gücləndirilməsi istiqamətində xüsusi imkanlar təqdim edir. Fakültənin nəzdində fəaliyyət göstərən təcrübə-tədris klinikası, o cümlədən anatomiya və multidisiplinar laboratoriyalar, əməliyyat bölmələri və diaqnostik otaqlar müasir avadanlıqlarla təchiz edilmişdir. Bu imkanlar tələbələrə müxtəlif heyvan növləri üzərində klinik müayinə, diaqnostika, profilaktika və müalicə prosedurlarını praktiki şəkildə mənimsəməyə şərait yaradır.  

Hasvet Baytarlıq Təbabəti fakültəsi “Vahid Sağlamlıq” yanaşmasını əsas götürərək heyvan sağlamlığı, ictimai sağlamlıq və qida təhlükəsizliyi arasında qarşılıqlı əlaqənin gücləndirilməsinə töhfə verməyi, həmçinin müasir və dayanıqlı baytarlıq xidmətlərinin inkişafında aparıcı akademik mərkəzlərdən birinə çevrilməyi hədəfləyir. 

Fakültə haqqında geniş məlumat üçün linkə daxil olun:

https://www.khazarhasvetvetmed.com