2024-сü il sentyabrın 30-da Karyera və Məzunlar Mərkəzinin təşkilatçılığı ilə Təhsil Tələbə Krediti Fondu əməkdaşının Xəzər Universitetinin ödənişli əsaslarla təhsil alan 1-ci kurs tələbələri ilə görüşü keçirilmişdir.

Karyera və Məzunlar Mərkəzinin direktoru Zərifə Əliyeva tədbiri açaraq, öz çıxışında ölkədə son illər ərzində təhsil sahəsində aparılan islahatların önəmindən danışdı,  təhsilalanlara geniş imkanların yaradıldığını qeyd etdi, Azərbaycan Respublikası Elm və Təhsil Nazirliyinin tabeliyində Təhsil Tələbə Krediti Fondunun yaradılması və fəaliyyət göstərməsinin mühüm addımlardan biri olduğunu vurğuladı.

Sonra Təhsil Tələbə Krediti Fondunun Təhsil müəssisələri üzrə iş şöbəsinin baş mütəxəssisi Günay Xəlilova fondun yaranma tarixi, məqsədi, tələbələr üçün yaratdığı imkanlar, təhsil tələbə kreditlərinin verilməsi qaydaları haqqında ətraflı məlumat verdi. O, təhsil tələbə kreditlərinin verilməsinin ilkin şərtləri, mərhələləri, kredit şərtlərinin üstünlükləri kimi məsələlərə aydınlıq gətirərək, tələbələri bu imkanlardan yararlanmağa dəvət etdi.

Tədbirin sonunda tələbələrin sualları cavablandırıldı.

2024-cü il  iyunun 11-də  Karyera və Məzunlar Mərkəzinin və Təbiət elmləri və mühəndislik fakültəsinin birgə təşkilatçılığı ilə “Kompüter elmləri” və “Kompüter mühəndisliyi” ixtisası üzrə təhsil alan sonuncu kurs  tələbələri üçün “Accessbank Günü” keçirilib. Görüşdə Accessbankın Təhsil və İnkişaf meneceri Xumar Hüseynova şirkətin fəaliyyəti, məqsədləri, əsas hədəfləri  barədə  geniş məlumat  verib.

Sonra bankın İnformasiya Texnologiyalarının İnkişafı  departamentinin direktor müavini Fərid Heydərov öz çıxışında daha çox “IT yay məktəbi" proqramı və müəssisənin işə qəbul prosesi ilə bağlı danışaraq  tələbələrin suallarını cavablandırıb.

Accessbankın Biznes tərəfdaşlığı üzrə mütəxəsisi Rima Cəfərova  işə qəbul üzrə uğur strategiyasından, ilkin araşdırma – karyera maraqlarım, şəxsi brendim, CV necə yazılır, müsahibəyə hazırlıq mərhələsi və tez-tez verilən suallardan  bəhs edib.

Sonda tələbələrin sualları cavablandırılıb.

2024-cü il iyunun 1-2-də Xəzər Universitetinin Karyera və Məzunlar Mərkəzinin təşklatçılığı ilə universitet rəhbərliyi, əməkdaşlar, məzunlar Azərbaycanın incisi  sayılan Şuşaya səfər ediblər. Səfər proqramı çərçivəsində Cıdır düzü, Səməd  bəy Mehmandarovların malikənəsi, Yuxarı Gövhərağa məscidi, Molla Pənah Vaqifin məqbərə kompleksi, Şuşa qalası, Xan qızı Natəvanın ev muzeyi, Bülbülün ev muzeyi ziyarət edilib.

 Səfərin ikinci günü, 2024-cü il iyunun 2-də   Şuşa şəhərindəki “Qarabağ” hotelinin konfrans salonunda Xəzər Universitetinin təsisçisi, Direktorlar və Qəyyumlar Şurasının sədri Prof. Akad.Hamlet İsaxanlının  Azərbaycanın və Türkiyənin  ictimai-siyasi xadimi, jurnalist, pedaqoq və yazıçı Əhməd bəy Ağaoğlunun həyatı və ədəbi-ictimai fəaliyyəti haqqında “Böyük narahat adam” adlı elmi seminarı baş tutub. 

Elmi seminarı giriş sözü ilə açan Dillər və ədəbiyyatlar departamentinin müdiri Dos. Dilbər Zeynalova Prof.Akad. Hamlet İsaxanlının XX əsr Azərbaycan ədəbi-ictimai həyatında mühüm rolu olan şəxsiyyətlərimiz haqqında apardığı araşdırmalardan qısaca  bəhs edib.Deyib ki, bu araşdırmalar arasında önəmli yer tutan  şəxsiyyətlərdən biri də Şuşa şəhərində dünyaya göz açan  böyük ictimai xadim Əhməd bəy Ağaoğlu olub.

 Sonra söz elmi seminarın əsas məruzəçisi  Hamlet  İsaxanlıya verilib. O, XX əsr Azərbaycan ictimai fikrinin görkəmli nümayəndəsi, Şuşada dünyaya göz açan yazıçı-publisist, siyasətçi Əhməd bəy Ağaoğlunun Azərbaycandakı və Türkiyədəki   ictimai-siyasi fəaliyyətindən,  son dərəcə zəngin və gərgin həyat yolundan, xalqın gələcəyi üçün daim narahat olan ziyalı ruhundan bəhs edib.

Məruzəçi eyni zamanda  Əhməd bəyin  bir redaktor, müxbir, qurucu,  ictimai təşkilat rəhbəri, millət vəkili, həm də bir müxalifətçi kimi yaşayıb yaratmasından,onun  Azərbaycan və Türkiyə mühitini, problemlərini eyni dərəcədə əhatə edən əsərlərindən danışıb. Natiq Əhməd bəy Ağaoğluna həsr olunmuş və onun biblioqrafiyasını əhatə edən  “Böyük narahat adam” kitabından geniş bəhs edib. Sonra söz Ə.Ağaoğlunun Türkiyə mühitindəki fəaliyyətinə həsr olunmuş dissertasiyanın və sözügedən kitabın  həmmüəllifi olan Dillər və ədəbiyyatlar departamentinin müəllimi Dr.Mədinə Karahana verilib. O, çoxşaxəli yaradıcılığa malik olan böyük türkçü Ə.Ağaoğlunun biblioqrafiyasını hazırlamağın məsuliyyətindən, bu irsin zənginliyindən  ətraflı söz açıb.

 Sonda  Hamlet İsaxanlı seminar iştirakçılarının suallarını cavablandırıb.

2024-cü il mayın 16-da  Xəzər Universiteti Karyera və Məzunlar Mərkəzinin təşkilatçılığı ilə İqtisadiyyat və menecment fakültəsinin sonuncu il tələbələri ilə Fish Farm şirkətinin görüşü təşkil olunub. Görüşdə şirkətin insan resursları üzrə aparıcı mütəxəssisi Ülviyyə Cəfərova Fish Farm şirkətinin fəaliyyəti və hədəfləri barədə ətraflı məlumat verərək tələbələri “Beynəlxalq Satış üzrə Mütəxəsis” inkişaf proqramı ilə tanış edib.O, inkişaf proqramının məqsədinin akvakultura, kürü istehsalı və satışı sahəsində təcrübəyə malik beynəlxalq satışlarda yeni nəsil mütəxəsislər yetişdirmək olduğunu vurğulaıb və tələbələri həmin proqrama müraciət etməyə dəvət edib.

 Qeydiyyatdan keçən tələbələr üçün şirkət tərəfindən imtahan təşkil olunacaq.  İmtahanı uğurla başa vuran tələbələr ikiillik ödənişli “Beynəlxalq Satış üzrə Mütəxəsis” inkişaf proqramına cəlb olunaraq mütəxəssis kimi yetişmək imkanı qazanacaqlar.

 Görüşün sonunda iştirakçıların və tələbələrin sualları cavablandırılıb.

Karyera və Məzunlar Mərkəzinin təşkilatçılığı ilə vaxtilə universitetdə təhsil alan, bu gün ölkəmizdə və onun hüdudlarından kənarda müxtəlif vəzifələr tutan, müəyyən mövqeyə malik ixtisaslı, peşəkar kadrlar arasında sıx əlaqələrin qurulması, onlarla əməkdaşlığın dərinləşməsi məqsədi ilə  2024-cü il mayın 4-də   Neftçilər kampusunun Mərmər Salonunda “Grand Alumni Homecoming 2024” adlı tədbir keçirilib. Tədbirə Xəzər Universitetinin  1996-2010-cu illərinin müxtəlif ixtisaslar üzrə məzunları, Universitet rəhbərliyi, müəllimlər və əməkdaşlar dəvət olunmuşdular. Tədbirə yüzə yaxın məzun olmaqla ümumilikdə 150-dən çox qonaq qatılmışdı. Məzunlar arasında İqtisadiyyat Nazirliyi yanında Antiinhisar və İstehlak bazarına Nəzarət Xidmətinin rəisi M. Abbasbəyli, Dövlət Məşğulluq Aqentliyinin İdarə Heyətinin sədri M. Abbasbəyli, Xəzər rayon İcra Hakimiyyətinin başçısı E. Salahov, Milli Məclisin millət vəkili C. Məmmədov və digər səlahiyyətli şəxslər də yer almışdılar. Tədbir şəbəkələşmə və bədii hissədən ibarət idi.

Məzunlar tədbirin şəbəkələşmə hissəsində illər sonra məzun olduqları doğma məkanda tələbə yoldaşları, dostları və müəllimləri ilə görüşərək həyatlarının ən şirin dönəmini, tələbəlik illərini xatırlayıb, uğur hekayələrini bölüşmək imkanı əldə etdilər. Daha sonra tədbir iştirakçıları bədii hissə üçün Mərmər Salona dəvət aldılar.

Karyera və Məzunlar Mərkəzinin direktoru Zərifə Əliyeva tədbir iştirakçılarını salamyaraq məzunları tələbəlik illərinə yenidən qaytarmaq üçün keçən günləri əks etdirən videoçarxa baxmağa dəvət etdi. Sonra o, çıxışında məzunların Universitet üçün nə qədər dəyərli və əhəmiyyətli olduqlarını vurğuladı. Həmçinin, o, öz çıxışında məzunları Universitetlə olan əlaqələrinin daha da möhkəmlənməsinə və əməkdaşlığa dəvət etdi. 

Tədbir iştirakçılarını salamlamaq üçün söz Xəzər Universitetinin təsisçisi, Direktorlar və Qəyyumlar Şurasının sədri Prof.Akad.Hamlet İsaxanlıya verildi. Akademik ali təhsil müəssisələrin gənclərin həyatındakı əhəmiyyətindən, məzunlara qarşı olan sevgisindən danışdı. -Evdəki övladlarımın sayını bilirəm, “Xəzər”dəki övladlarımın sayını bilmirəm, çoxdurlar!- dedi. Akademikin  səmimi və sevgi dolu çıxışı alqışlarla qarşılandı.

Məzunlar adından İqtisadiyyat Nazirliyi yanında Antiinhisar və İstehlak bazarına Nəzarət Xidmətinin rəisi M. Abbasbəyli çıxış edərək, Xəzər Universitetinin onun və digər məzunların həyatında buraxdığı izdən, tələbəlik illəriylə bağlı xatirələrindən danışdı.

Bütün çıxışlardan sonra C.Cabbarlının “Sevil” pyesinin motivləri əsasında dünya şöhrətli  bəstəkarımız Fikrət Əmirovun qələmə aldığı eyniadlı operası nümayiş olundu. Tamaşanın  bədii rəhbəri Xəzər Universiteti Musiqi və incəsənət departamentinin rəhbəri, əməkdar müəllim Zülfiyyə Sadıqova, əsas rolların ifaçıları isə Universitetin müxtəlif illər və ixtisaslar üzrə məzunları idilər. Onların peşəkar ifaları böyük coşqu və alqışlarla müşahidə olundu.

2024-cü il aprelin 29-da  Xəzər Universiteti Karyera və Məzunlar Mərkəzinin təşkilatçılığı ilə İqtisadiyyat və menecment fakültəsinin maliyyə, mühasibat və audit ixtisasları üzrə təhsil alan 3-cü və 4-cü kurs tələbələrinin karyera inkişaflarına dəstək olmaq və onlara iş imkanları yaratmaq məqsədilə “KPMG Azerbaijan” şirkətinin Audit Karyera günü keçirildi. 

Görüşü Karyera və Məzunlar Mərkəzinin direktoru Zərifə Əliyeva açıq elan etdi və şirkətin əməkdaşlarını tələbələrə təqdim etdi. Şirkətin audit direktoru, Xəzər Universitetinin məzunu Mələk Abbaslı KPMG şirkətinin fəaliyyəti haqqında ətraflı məlumat verdi.  O, təqdimatında “KPMG Azerbaijan” şirkətinin dünyanın ən böyük peşəkar xidmətlər şəbəkələrindən biri olduğunu, əsasən audit, vergi və konsaltinq üzrə xidmət göstərdiyini qeyd etdi. Daha sonra şirkətin audit üzrə köməkçi meneceri Ramin Əmiraslanov “KPMG Azerbaijan” şirkətində iş tapmaq imkanları və hazırda aktiv olan vakansiyalar barədə məlumat verdi. Daha sonra şirkətin əməkdaşları tələbələri maraqlandıran sualları cavablandırdı.

Tədbirin yekununda “KPMG Azerbaijan”-nın potensial işçisi olmaq istəyən tələbələr üçün şirkətin əməkdaşları imtahan keçirtdi. İmtahanı müvəffəqiyyətlə verən tələbələr şirkət tərəfindən işlə təmin olunacaqlar.

18 Mart, 2024-cü il tarixində Xəzər Universitetinin İngilis dili və Ədəbiyyatı Departamentinin təşkilatçılığı və Karyera Mərkəzinin dəstəyi ilə Xəzər Universitetinin məzunu və “Global Gates Academy”nin direktoru Ellada Əliyeva tərəfindən ingilis dili müəllimliyi ixtisasında təhsil alan tələbələrə “Teacher Training” adlı təlim keçirilmişdir. Təlim proqramına müasir öyrətmə texnikaları, dərsin təşkili, dərs planının hazırlanması, tələbə psixologiyası və digər məsələlər daxildir.

Karyera və Məzunlar Mərkəzinin təşkilatçılığı ilə 2024-cü il martın 12-də saat 14:00 -da Mərmər salonda Azərbaycan Hotel Assosiasiyası tərəfindən Xəzər Universitetinin İqtisadiyyat və Menecment fakültəsinin “Turizm” ixtisasında, həmçinin Mühəndislik və təbiət elmləri fakültəsinin “Dizayn” ixtisasında təhsil alan tələbləri üçün "Gələcəyin Qonaqpərvərlik Liderləri" - Uğur Hekayələri görüşü keçirilib. Karyera və Məzunlar Mərkəzinin direktoru Zərifə Əliyeva qonaqları və tələbləri salamlayaraq, qonaqpərvərlik mövzusunda maarifləndirmənin genişlənməsinin vacib olduğunu qeyd edib.

Sonra çıxış edən İqtisadiyyat və menecment fakültəsinin dekanı Ceyhun Məmmədov universitet və fakültə haqqında qısa məlumat verdikdən sonra turizm sahəsinin inkişafının vacibliyini və tələbələrin bu sahə üzrə təcrübədə olmalarının önəmini vurğulayıb.İqtisadiyyat və menecment fakültəsinin koordinatoru Bahadur Baysal və həmin fakültənin müəllimi Qəhrəman Yusupov da mövzu ətrafında fikirlərini ifadə ediblər.

Tədbirdə Four Seasons Hotel Baku hotelinin meneceri Özgür Sezercan, JW Absheron Baku Hotel & The Ritz-Carlton Baku-da Cluster HR direktoru Sevinc Purvis, Radisson Hotel Baku-nun Kommersiya direktoru Nigar Nəsirova, Azərbaycan Hotellər Assosiasiyasının icraçı direktorunun müavini Nərmin Aktaş çıxış ediblər. Hər spiker 10-15 dəqiqə ərzində “Uğurun arxasındakı hekayə”, “Niyə qonaqpərvərlik” və ya oxşar ruhlandırıcı mövzular haqqında danışıblar və hər biri öz uğur hekayələrini tələbələrlə paylaşıblar və karyeralarını qurarkən hansı maneələrlə qarşılaşdıqlarını, qonaqpərvərlik prinsiplərinin inkişafı üçün nələr etməyin vacib olduğunu, turizm sektorunun dayanıqlı inkişafını təmin etmək üçün daim təşəbbüs göstərdiklərini söyləyiblər.

Sonda sual-cavab sessiyası başlayıb. Müsabiqədə ən aktiv 6 tələbə qalib seçilib və həmin tələbələr spikerlərin çalışdığı hotellərdə spikerlə birlikdə qəhvə içmək şansı qazanıblar.

2024-cü il fevralın 19-da Xəzər Universitetinin Mərmər salonunda universitet tələbələri üçün Karyera və Məzunlar Mərkəzinin təşkilatçılığı ilə “Uğurlu insan olmaq üçün nə etməli?” mövzusunda seminar keçirilib. Məruzəçi Milli Məclisin deputatı, Xəzər Universitetinin magistr məzunu, ilahiyyat üzrə fəlsəfə doktoru Ceyhun Məmmədov idi.

Karyera və Məzunlar Mərkəzinin direktoru Zərifə Əliyeva tədbir iştirakçılarını salamlayaraq, mərkəzin fəaliyyəti haqqında qısa məlumat verib və məzunlarla universitet arasındakı əlaqələrin möhkəmləndirilməsinin vacibliyi barədə fikir və mülahizələrini ifadə edib.

Xəzər Universitetinin rektoru Dos. İradə Xəlilova mərkəzin təşkilatçılığı ilə baş tutan bu kimi tədbirlərin önəmini və xüsusilə tələbələr üçün mühüm əhəmiyyət kəsb etdiyini vurğulayıb.

Ceyhun Məmmədov öz məruzəsində tələbələrin gələcək şəxsi və iş həyatlarında uğur qazanmaları üçün nələrə diqqət yetirməli olduqları ilə bağlı tövsiyələr verərək, onlara vaxtın idarə olunması, mənəviyyat, əxlaq, dil bilikləri və s.-nin önəmindən danışıb. Qeyd edib ki, belə görüş və tədbirlərin Azərbaycan gənclərinin inkişafına, bilik və bacarıqlarının artırılmasına, intellektual səviyyələrinin və dünyagörüşlərinin zənginləşməsinə xidmət edir.

Tədbirdə Ceyhun Məmmədovun təşkilatçılığı ilə yaradılmış Dost Gəncləri İnkişaf Klubunun nümayəndələri də iştirak ediblər. Klubun sədri Ömər Hüseyinli klubun fəaliyyəti barədə ətraflı məlumat verib və tələbələri onlarla birgə əməkdaşlığa dəvət edib.

Millət Məclisin deputatı sonda tələbələrin suallarını cavablandırııb.