2023-cü il oktyabrın 21-də Xəzər Universitetinin Psixologiya departamenti və psixologiya ixtisası tələbələri tərəfindən təsis edilmiş “PsychoClub”-un birgə əməkdaşlığı ilə “film analizi” günü keçirildi. Tədbirin təşkilində əsas məqsədlər tələbələrin asudə vaxtlarının səmərəli keçirilməsi, filmləri psixoloji cəhətdən təhlil edərək bu sahədəki biliklərinin artırılması, eləcə də, onların bir-biri ilə sosiallaşmasına şərait yaratmaq idi.
Tədbirdə Psixologiya departamentinin koordinatoru Mələk Kərimova belə tədbirlərin əhəmiyyətini vurğuladıqdan sonra film izlənildi. Analiz üçün “Toc-Toc” filmi seçilmişdi. Filmin mövzusu Obsessiv-Kompulsiv Pozuntudan əziyyət çəkən insanların yaşadıqları çətinliklər və bu problemlərin öhdəsindən gəlmə üsulları idi. Sonra tələbələrin aktiv iştirakı ilə film təhlil edildi və Xəzər Universitetinin Psixologiya departamentinin assistenti Mirsadiq Muxtarov tərəfindən ümumiləşdirildi. O, filmin mövzusuna istinad edərək, Obsessiv-Kompulsiv Pozuntunun nə olduğu və hansı terapiya növləri ilə yanaşılacağını izah etdi.
Tədbir tələbələrin böyük marağına səbəb oldu. Departament tərəfindən bu tip silsilə tədbirlərin keçirilməsi nəzərdə tutulur.
2023-cü il noyabrın 30-da Xəzər Universitetinin Psixologiya departamentinin assistenti və “Xəzər Psixoloji Xidmət Mərkəzi”-nin psixoloqu Mirsadiq Muxtarov tələbə məclisinin dəvəti ilə Bakı Ali Neft Məktəbində “Psixopatologiyaya ümumi baxış” mövzusunda seminar keçirmişdir. Seminarın təşkilində əsas məqsəd tələbələrin psixopatologiya haqqında maariflənməsi, psixi xəstəliklər haqqında düzgün bilgilərə sahib olmaları idi.
Seminarda tələbələrə psixopatologiya anlayışı və onun tarixi inkişafından bəhs edilmişdir. Bununla yanaşı, etiketləmə (stiqma) mövzusuna da toxunularaq, psixi problemli şəxslərə qarşı qərəzli təsəvvürlərin yaranmasına qarşı addımlar barədə müzakirə aparılmışdır. Stiqmaya məruz qalan şəxslərin cəmiyyətdən ayrı olaraq qruplaşdırılmasının fəsadları vurğulanmışdır. Seminarın davamında müasir psixologiyada psixopatologiyanın ümumi təsnifatına də nəzər yetirilmişdir. Tələbələrə həmçinin depressiya və digər emosional pozuntular, eləcə də şəxsiyyət pozuntularından ətraflı bəhs edilmişdir.
Tələbələr aktiv şəkildə müzakirələrə qoşularaq, təlimçiyə mövzu ilə əlaqədar suallar vermişlər.
2023-cü il dekabrın 15-16-da Xəzər Universitetinin Psixologiya departamentinin təşəbbüsü və Fullbright Scholarship müəllimi Dr. Elnur Gajıyevin rəhbərliyi ilə “Yaradıcı psixologiya simpoziumu” keçirilib. Simpoziumun keçirilməsində əsas məqsəd yaradıcı terapevtik yanaşmalara artan tələbat və Azərbaycanda bu mövzu ilə bağlı elmi praktiki tədbirin təşkili, bu terapiya sahəsinə marağın daha da artırılması və daha geniş əhali kütləsini maarifləndirmək olub.
İki gün davam edən simpoziumun ilk günü İçərişəhərdə yerləşən “Passage 1901” ünvanında baş tutub və 4 sessiyadan ibarət təşkil olunub. Bu sessiyalarda yaradıcı terapiyalar və onların növləri ilə əlaqədar elmi və praktiki çalışmalar nümayiş etdirilib.
Simpoziumum açılışı zamanı yaradıcı terapiyaların ümumi effektivliyi, tətbiqi və elmi əsasları barədə Xəzər Universiteti Psixologiya departamentinin koordinatoru Mələk Kərimova məruzə edib. ABŞ-ın Azərbaycandakı səfirliyinin İctimai əlaqələr şöbəsinin müdiri Stefan Qays çıxışında Fullbright proqramının və Azərbaycanda fərqli formatda təşkil edilən bu simpoziumun əhəmiyyətini qeyd edib.
Azərbaycan İncəsənət Birliyinin üzvü, tibb üzrə fəlsəfə doktoru Mehriban Şəmsəddinskaya “Metoforik portret” mövzusu ilə məruzə edib. Azərbaycanın incəsənət xadimi Səbinə Şıxlinskaya “Kollektiv mənlik” mövzusu barədə fikirlərini iştirakçılarla bölüşüb.
Sessiyanın davamında klinik psixoloq Dr. Elnur Gajıyev poeziya terapiyasının önəmini və effektivliyini vurğulayaraq, bu sahədə praktik nümunələri diqqətə çatdırıb.
Son sessiyada panel müzakirəsi təqdim edilərək, iştirakçıların interaktiv çıxışı dinlənilib. Bununla yanaşı, simpoziumda iştirak edən iştirakçılar rəsm əsərləri çəkərək öz sənət bacarıqlarını nümayış etdiriblər. “Kollektiv mənlik” anlayışını ifadə edən və hamının iştirakı ilə yaradılan rəsm əsəri də simpoziumda iştirakçıların böyük marağına səbəb olub.
Simpozimun ikinci hissəsi Heydər Əliyev Fondunun vitse-prezidenti Leyla Əliyevanın təşkilatçılığı ilə yaradılmış “Nine Sense” Yaradıcılıq Mərkəzində keçirilib. 3 sessiyadan ibarət olan bu hissədə ilk olaraq yoqa müəllimi, təlimçi Qafar Qənızadə yoqa və onun faydalarından bəhs edərək, onun insan psixologiyasına təsiri barədə məlumat verib. Sonra iştirakçılarla birlikdə yoqa təlimi aparılıb. Səs terapisti, musiqiçi, “Om Shri” studiyasının təsisçisi İlhamə Babayeva musiqi və səs terapiyasının əsaslarını iştirakçılara izah edib. Səs və musiqi terapiyasının ruh və bədən sağlamlığına faydaları müzakirə olunub.
Simpoziumun davam edən növbəti sessiyalarında “DanceAbilty Azerbaijan” təsisçisi Nigar Soltanova rəqs terapiyasının psixi, fiziki və zehni faydaları barədə mülahizələrini bölüşərək, inklüzivliyi anlamağımızda hərəkət terapiyasının əhəmiyyətini praktiki çalışmalar yolu ilə nümayiş etdirib. Psixoloq Günel Muradova ümumi davranışsal aktivliyin önəminə diqqət çəkərək, hərəkət və fiziki aktivliyin bilavasitə psixi sağlamlıqla əlaqəli olduğunu söyləyib.
Tədbirin sonunda təqdim olunan hərəkət və rəqs performansları iştirakçıların böyük marağına səbəb olub. Simpozimun sonunda könüllülərə və iştirakçılara sertifikatlar təqdim olunub.
“Yaradıcı psixologiya simpoziumu” ictimai maraq doğurub və mətbuat səhifələrində işıqlandırılıb.
https://report.az/medeniyyet-siyaseti/bakida-ilk-yaradici-psixologiya-simpoziumu-kecirilir/
Xəzər Universitetinin Psixologiya departamentinin müəllimi və Respublika Narkologiya Mərkəzinin psixoloqu Ramin Allahverdiyev tərəfindən 2023-cü ilin yanvar-may aylarında İngilis dili müəllimliyi, Dizayn və İqtisadiyyat ixtisaslarının tələbələrinə “Psixoaktiv maddələrin istifadəsinin zərərli təsirləri” mövzusunda seminarlar təşkil edilib.
Seminarların əsas hədəfi tələbələrin psixoaktiv maddələrin insan sağlamlığına təsirinin zərərlərindən xəbərdar edilməsidir. Psixoaktiv maddələrin istifadəsinin zərərləri ilə birlikdə bu məsələyə dair tələbələrin ümumi məlumat səviyyəsinin artırılmasına da diqqət yetirilmişdir. Gənclərin sosio-ekonomik və ailə problemləri, uyğunsuz sosial mühitlərin mənfi təsiri kimi məsələlər müzakirə olunmuşdur. Tələbələrə psixi və fiziki sağlamlıqlarını necə qoruya biləcəkləri və alternativ yollar barədə də məlumatlar verilmişdir.
Seminarlar tələbələr tərəfindən maraqla qarşılanmış, onların sualları cavablandırılmışdır.
2021-ci il dekabrın 6-da Xəzər Universiteti Psixologiya departamentinin koordinatoru Mələk Kərimova İctimai Televiziyanın “Sabaha saxlamayaq” verilişinin qonağı oldu. Verilişin mövzusu internat uşaqlarının cəmiyyətə inteqrasiyası ilə bağlı olub, onların yaşadıqları çətinliklər, psixoloji maneələr kimi məsələlərlə bağlı idi. Belə ki, valideyn himayəsindən məhrum olmuş və ya valideynini itirən uşaqların cəmiyyətə asan uyğunlaşa bilmələri üçün sosial, psixoloji və hüquqi məsələlərə toxunuldu
Verilişi aşağıdaki linkdən izləmək olar:
2021-ci il oktyabrın 27-də Xəzər Universiteti Psixologiya departamentinin koordinatoru Mələk Kərimova Almaniya Beynəlxalq Əməkdaşlıq Cəmiyyəti tərəfindən icra edilən Cənubi Qafqazda Yerli İnkişaf üçün Yaxşı İdarəetmə layihəsi çərçivəsində təşkil edilən tədbirdə iştirak etmişdir.
Layihədə dövlət idarəetməsində və qərar qəbul etmədə gender bərabərliyinin təmin edilməsi istiqamətində görülən işlər haqqında məlumat verilmiş, cəmiyyətdəki genderlə bağlı streotiplər, dövlət qulluğuna müraciət edənlərin gender balansı məsələləri müzakirə olunmuşdur.
Tədbir bu istiqamətdə görülən işlərin davamı olaraq Azərbaycanda ilk dəfə çap olunan “Dövlət qulluğunda gender bərabərliyi üzrə kurikulum” metodik vəsaitinin təqdimatı ilə davam etdirilmişdir. Vəsait Dövlət İmtahan Mərkəzi, Ailə, qadın və Uşaq Problemləri üzrə Dövlət Komitəsinin, Almaniya Beynəlxalq Əməkdaşlıq Cəmiyyəti və Bakı Dövlət Universitetinin birgə əməkdaşlığı nəticəsində hazırlanaraq, çap edilmişdir.
Təlimin sonunda dövlət qulluğunda gender bərabərliyinə dair aktual məsələlərin müzakirəsi aparılıb və universitetlərdə gender balansı ilə bağlı peşələr müzakirə edilərək, təkliflər irəli sürülüb.
Xəzər Universiteti Psixologiya departamentinin koordinatoru Mələk Kərimovanın “Terapevtik ünsiyyətin əsasları” metodik dərs vəsaiti “Elm və Təhsil” nəşriyyatında çapdan çıxmışdır.
Kitabda psixoloji seanslarla bağlı aktual nəzəri və praktiki məsələlərə yer verilmişdir. Müəllif məzun və tələbələrin psixoloji konsultasiya ilə məşqul olduqları zaman üzləşdikləri suallara cavab verməyə səy göstərmişdir. Kitaba anonimlik və etik prinsiplər qorunmaqla real pasiyent ifadələri verilərək, praktiki çalışmalar daxil edilmişdir.
Kitab ali məktəb tələbələri üçün nəzərdə tutulmuşdur və psixoloji konsultasiya dərsində metodik vəsait kimi istifadə oluna bilər. Dərs vəsaiti Xəzər Universiteti Elmi şurasının qərarı ilə çapa tövsiyə edilmişdir.
Xəzər Universiteti Psixologiya departamentinin koordinatoru, Xəzər Psixoloji Xidmət Mərkəzinin direktoru Mələk Kərimovanın “Peşə bacarıqlarının formalaşmasında superviziyanın rolu” adlı məqaləsi pedaqogika, psixologiya elmləri üzrə elmi-nəzəri-metodik nəşr olan “Pedaqogika” jurnalının 2021-ci il 1-ci sayında dərc edilmişdir.
Beynəlxalq praktikada tətbiq edilən və ruhi sağlamlıq sahəsində çalışan mütəxəssislərin psixoloji konsultasiya bacarıqlarının formalaşmasında əhəmiyyətli olan superviziya prosesi pilot tədqiqat olaraq Xəzər Universitetində aparılmış və nəticələri məqalədə əks olunmuşdur.
Xəzər Psixoloji Xidmət Mərkəzinin rəhbəri psixoloq Mələk Kərimova 2021-ci il aprelin 11-də İsmayıllı rayonunda yerləşən Niyal kurslarının dəvəti ilə abuturiyentlərlə onlayn vebinar keçirmişdir. "İmtahan öncəsi psixi sağlamlığı qoruma yolları" adlı webinarda İsmayıllı, Qəbələ, Ağdaş, Göyçay, Ucar və Bakıdan çoxlu abituriyent iştirak etmişdir.
Vebinarda imtahan öncəsi stress, onu dəf etmək yolları, imtahana məhsuldar hazırlanma, vaxtın idarə edilməsi kimi müxtəlif istiqamətlərdə müzakirələr aparılmış, şagirdlərin sualları cavablandırılmışdır. Vebinarın sonunda şagirdlər tədbirin faydalı olduğunu bildirmişlər.
Xəzər Universiteti Psixologiya departamentinin koordinatoru, Xəzər Psixoloji Xidmət Mərkəzinin rəhbəri psixoloq Mələk Kərimova Avrasya Universitetlər Birliyi (EURAS) və UNEC (İnklüziv Təhsil Mərkəzi) əməkdaşlığı çərçivəsində 2021-ci il mayın 5-də keçiriləcək “Əlilliyi olan şəxslərə koronavirus dönəminin təsirləri-universitet tələbələrinin psixi sağlamlığı” adlı təlimdə iştirak edəcək. O, “Azərbaycanda Covid mərhələsində universitet tələbələri arasında görülən psixoloji simptomların müəyyənləşdirilməsi” mövzusunda tədqiqatı ilə əlaqədar çıxış edəcək. Təlimdə İnklüziv Təhsil Mərkəzinin rəhbəri Sevinc Məhsimova, Global Əlillər Fondunun (GDF) rəhbəri Nejdet Öztürk, Yuvam Mərkəzinin rəhbəri Prof. Dr. İmer Okarın çıxışı da planlaşdırılmışdır.
Xəzər Universiteti Psixologiya departamentinin koordinatoru, Xəzər Psixoloji Xidmət Mərkəzinin rəhbəri Mələk Kərimova, Amerika Adelphy Universitetinin əməkdaşı Prof.Dr. Chistopher Muran və Amerika Yeshiva Universitetinin əməkdaşı Prof. Dr. Catherine Eubanksın 2021-ci il iyunun 19-da birgə keçirdikləri “Terapevtik ittifaqın qurulmasında yaşanan çətinliklər və yenidən münasibətlərin tənzimlənməsi” mövzusunda seminarda iştirak etmişdir.
Seminar “Türkiyə Ruh Sağlığı Dərnəyi” və “Kim” Psixologiya Mərkəzinin birgə təşkilatçılığı ilə keçirilmişdir.
Xəzər Universiteti Psixologiya departamentinin koordinatoru, Xəzər Psixoloji Xidmət Mərkəzinin rəhbəri Mələk Kərimova 2021-ci il iyunun 17-19-da “Qarabağ beynəlxalq sosial və bəşəri elmlərdə: müasir araşdırmalar” mövzusunda keçirilmiş kongresdə “Covid-19 pandemiyası dövründə universitet tələbələrinin psixi sağlamlıqlarının dəyərləndirilməsi” mövzusunda çıxış etmişdir.
Tədqiqat Xəzər Universiteti tələbələri üzərində aparılmış və tələbələrin pandemiya müddətində yalqızlıq duyğularının artdığı, həyat tərzlərinin dəyişildiyi, adaptasiya çətinlikləri, gələcəklə əlaqəli qeyri-müəyyənliklərinin və ümidsizliyinin artdığı müəyyən edilmişdir. Bununla birlikdə, tələbələrlə keçirilən sorğu nəticəsində bir qrup tələbənin isə bu mərhələni daha rahat keçirdiyi, müsbət qiymətləndirdiyi və daxili imkanlarını artırdığı, ailəsi ilə daha çox vaxt keçirmək üçün imkan əldə etdiyi məlum olmuşdur. Tədqiqat nəticələrinə əsasən tələbələrin psixi sağlamlıqlarının gücləndirilməsi üçün təkliflər verilmişdir.
EMDR metodu 1989-cu ildə amerikalı psixiatr Francino Saphiro tərəfindən ortaya qoyulan psixo-fizioloji təməlli bir metoddur. Göz hərəkətləri ilə hissizləşdirmə və yenidən işləmə kimi qeyd edilən bu metod ancaq EMDR Avropa Təşkilatının icazə verdiyi təlimçilər vasitəsilə verilə bilən bir təlimdir.
EMDR Türkiyə təmsilçisi Asena Yurtsever tərəfindən verilən beynəlxalq təlimin birinci modülündə Xəzər Universiteti Psixologiya departamentinin koordinatoru, Psixoloji Xidmət Mərkəzinin rəhbəri Mələk Kərimova da iştirak etmişdir.
Metod bir sıra psixi pozuntular və xüsusilə travmatik yaşam təcrübələri zamanı istifadə edilərək, qısa müddətdə müsbət nəticələr verməkdədir.
“Xəzər”in əməkdaşı psixoloji təlimdə iştirakına görə sertifikat almışdır
Xəzər Universiteti Psixoloji Xidmət Mərkəzinin rəhbəri, Psixologiya departamentinin koordinatoru Mələk Kərimova Türkiyə Respublikası Ruh Sağlığı Dərnəyi və Kim Psixologiya Mərkəzinin təşkil etdiyi "Ölüm və Yas Terapiyası" təlimlərinin hər iki mərhələsini tamamlayaraq, sertifikat almışdır.
2020-ci il mayın 11-də Xəzər Universiteti Psixologiya departamentinin koordinatoru Mələk Kərimova və müəllimi Cəmilə Rəhimli tərəfindən Zoom proqramı vasitəsilə mühazirə təşkil edildi. Mühazirəyə qonaq olaraq, Hacettepe Universitetinin professoru Tuncay Ergene dəvət edilmişdi. Professor Tuncay Ergene daha əvvəllər də Xəzər Universitetinin Beynəlxalq Psixologiya Konfransının qonağı olmuşdu. Qeyd edək ki, o, Ohio, Harvard universitetlərində karyerasını inkişaf etdirmiş və 6 il Türk PDR dərnəyinin rəhbəri vəzifəsində işləmişdir.
Hazırda öz fəaliyyətinə Hacettepe Universitetində davam edən professor Tuncay Ergene aktual məsələlərdən biri olan “Krizis zamanı ilk psixoloji yardım” mövzusunda mühazirə oxudu. O, hər hansı bir pandemiya zamanı cəmiyyətin qarşılaşdığı qeyri-müəyyənliyin, sağlamlıqla əlaqədar təhdidlərin insan psixologiyasına təsirlərindən, mütəxəssislərin üzərinə böyük məsuliyyət düşdüyündən, müxtəlif yanaşma və metodlardan bəhs edərək, sualları cavablandırdı. Mühazirədə müxtəlif universitetlərin psixologiya ixtisası tələbələri də iştirak edərək, öz təəssüratlarını və müsbət rəylərini bildirdilər. Tuncay Ergene belə görüşlərin həm elmi, həm də sosial dəstək cəhətdən qiymətli olduğunu vurğuladı.
2020-ci il mayın 3-də Xəzər Universiteti Psixologiya departamentinin koordinatoru psixoloq Mələk Kərimova ilə Ankara şəhərində yerləşən İda Psixoloji Xidmətlər Mərkəzinin rəhbəri psixoloq konsultant Beyhan Okur ilə “Oyun terapiyası” mövzusunda onlayn seminar təşkil edildi. Seminarda oyun terapiyası, iştirakçıları, problemləri və yaş uyğunluğu, təhsilin əsas şərtləri mövzusunda maraqlı müzakirələr aparılaraq, izləyicilərdən gələn suallar cavablandırıldı.
21 aprel 2020-ci il tarixində Xəzər Universitetinin tərəfdaşı olduğu Erasmus+ MEDIATS layihəsi çərçivəsində layihənin Ukraynalı koordinatoru olan KROK Universitetinin əməkdaşları Qalina Boqaçenko və Andrey Lotaryev ilə ZOOM platforması vasitəsilə onlayn görüş keçirilmişdir. Görüşdə Xəzər Universitetindən Siyasi Elmlər və Fəlsəfə departamentinin müdiri Dr. Elmar Mustafayev, Təlim və Təhsil Mərkəzinin direktoru Ülkər Bayramova və Xəzər Psixoloji mərkəzinin rəhbəri Mələk Kərimova və Psixologiya departamentinin müəllimi Nilufər Əlizadə iştirak etmişdir.
Onlayn görüşdə layihə çərçivəsində mediasiya ilə bağlı materialların hazırlanması, nəşri və magistr ixtisasının açılması ətrafında geniş müzakirələr aparılmış, koordinator universitetin bu sahədəki təcrübələri görüş iştirakçılarına çatdırılmışdır. Həmçinin layihə çərçivəsində bundan sonra görüləcək bəzi işlərə də toxunulmuşdur və növbəti onlayn görüşün mövzusu müəyyənləşdirilmişdir.
Qeyd edək ki, koordinatorla onlayn görüş zamanı layihənin digər Azərbaycan tərəfdaşı olan Gəncə Dövlət Universitetinin əməkdaşları da iştirak etmişlər.
2020-ci il fevralın 28-də Xəzər Universiteti Psixologiya departamentinin koordinatoru, Xəzər Psixoloji Xidmət Mərkəzinin rəhbəri Mələk Kərimovanın təşkilatçılığı ilə departamentin müəllimləri Aydan Xasməmmədzadə, Şəbnəm Soltanlı və HP Güvən klinikasının həkim ginekoloqu Nazxanım Qasımova tərəfindən “Cinsi funksiyalarda pozuntular və psixo-fizioloji yanaşmalar” mövzusunda təlim keçirildi. Təlimdə cinsi xəstəliklər, cinsi inkişaf zamanı baş verən psixo, fizioloji dəyişikliklər haqqında ətraflı məlumat verildi. Təlimdə monoqam və poliqam münasibətlərin tarixi ilə əlaqəli məlumat verən Şəbnəm Soltanlı bununla bağlı tələbələrlə müzakirələr apardı.
Təlimin əsas məqsədi bu sahədə tələbələri tibb və psixoloji biliklərlə maarifləndirmək, gələcəkdə baş verə biləcək sağlamlıq problemlərinin qarşısını almaqdır. Təlimdə tələbələr tərəfindən verilən suallar ətraflı cavablandırıldı.
2020-ci il fevralın 22-si və 23-də Xəzər Universiteti Psixologiya departamentinin koordinatoru və Xəzər Psixoloji Xidmət Mərkəzinin rəhbəri Mələk Kərimova Girne Psixoloji Danışma, Şəxsi inkişaf, Təlim və Araşdırma mərkəzi, NS Consulting şirkəti və klinik psixoloq Sevinc İsmayılovanın təşkilatçılığı ilə keçirilən “Klinik Sağlıq Psixologiyası” təliminə qonaq qismində dəvət olundu. Təlim Beynəlxalq Kipr Universitetinin dosenti Linda Fraim tərəfindən keçirilirdi.
Təlimdə müasir dövrdə psixologiya sahəsində öz aktuallığı ilə seçilən sağlıq psixologiyası sahəsinin inkişaf mərhələləri, müxtəlif ölkələrdəki tətbiqi çətinlikləri, insan sağlamlığını təhdid edən amillər və amillərdə insanın şüurlu yanaşmaları üzərində duruldu. Təlimin ilk günündə insanın sağlam həyat tərzi, xəstəliklər, sağlamlığı qavrama anlayışları da müzakirə edildi. Təlimin ikinci günündə isə sağlıq psixologiyası sahəsində istifadə edilən klinik testlər və onların necə tətbiq ediləcəyi ilə əlaqədar ətraflı məlumat verildi və tətbiqi ilə əlaqədar təlimatlara da xüsusi yer verildi.
Təlim sonrası M.Kərimova dosent Linda Fraimlə Xəzər Universitetinin əməkdaşlığı məsələlərini müzakirə edərək, departamentin bu sahədəki işləri ilə əlaqədar məlumat verdi.
2020-ci il yanvarın 13-dən 16-dək Xəzər Universitetinin tərəfdaş kimi iştirak etdiyi Avropa Komissiyasının “Erasmus+” proqramının “MEDIATS” layihəsi çərçivəsində İspaniya Krallığının Mursiya şəhərində yerləşən San Antonio adına Katolik Universitetində intensiv təlim və tədris təcrübəsi formatında görüşlər keçirildi.
“MEDIATS” layihəsinin əsas məqsədi universitetləri mediasiya sahəsində aparıcı qüvvələrə çevirmək Azərbaycanda, Gürcüstanda və Ukraynada Avropa təcrübəsindən faydalanaraq, münaqişələrin məhkəməyə qədər obyektiv həllini yaxşılaşdırmaqdan ibarətdir.
Təlimdə Xəzər Universitetindən Siyasi elmlər və fəlsəfə departamentinin müdiri Dr. Elmar Mustafayev, Təlim-tədris mərkəzinin direktoru Ülkər Bayramova, Psixologiya departamentinin rəhbəri Mələk Kərimova, Beynəlxalq əlaqələr ofisinin koordinatoru Lamiyə Pənahova, Psixologiya departamentinin müəllimi və doktorantı Nilufər Əlizadə iştirak edirdilər.
İqtisadiyyat və menecment fakültəsinin dekanı Dr. Ceyhun Məmmədov tədris təcrübəsi görüşündə iştirak edərək beynəlxalq iştirakçı sertifikatı ilə təltif olundu.
Təlimlərin bir hissəsi isə intensiv seminara həsr olunmuşdu. Bir həftə davam edən seminar-məşğələdən sonra iştirakçılar üç ölkə (Niderland Krallığı, Latviya, İspaniya) təcrübəsinin yekunu olaraq imtahan verərək, beynəlxalq diplomlara layiq görüldülər. Xəzər Universitetinin əməkdaşları digər iştirakçılarla müqayisədə ən yüksək göstəriciləri əldə edərək, 3 iştirakçının (Mələk Kərimova, Lamiyə Pənahova, Nilufər Əlizadə) Beynəlxalq Mediasiya Federasiyası və Niderland Biznes Akademiyasının birgə hazırladığı Beynəlxalq dərəcəli Mediator diplomu əldə etdiyi yeganə universitet oldu. Digər əməkdaşlar da imtahanı uğurla tamamlayaraq, Mediasiya üzrə beynəlxalq konsultant diplomu əldə etdilər (Dr. Ceyhun Məmmədov, Dr. Elmar Mustafayev, Ülkər Bayramova).
2019-cu il dekabrın 19-da TİKA, Zərərli Vərdişlərə qarşı İçtimai Birlik, Türkiyə “Yeşilay” Dərnəyi, Xəzər Universiteti Psixoloji Xidmət Mərkəzi və Müasir Psixologiya Mərkəzinin birgə əməkdaşlığı ilə “Asılı olma, azad ol!” adlı tədbir təşkil edildi. Tədbirin əsas məqsədi asılılıq növləri ilə əlaqəli tələbələri maarifləndirmə, asılılıqla mübarizə və qorunma yolları ilə bağlı fərqindəlik yaratmaq idi.
Tədbirin təşkilatçısı psixoloq Mələk Kərimova mövzunun ölkəmiz üçün çox əhəmiyyətli olduğunu qeyd edərək, sağlam nəsillər, təmiz ətraf mühitin formalaşmasında hər bir vətəndaşın məsuliyyətli və həssas davranmasını xüsusilə qeyd etdi.
Xəzər Universitetinin rektoru Dr. İradə Xəlilova da mövzunun aktuallığını qeyd edərək, qonaqları salamladı.
Tədbirdə Ege Universitetinin müəllimi psixiatr Prof. Dr. Hakan Coşkunol, Türkiyə “Yeşilay” Cəmiyyətinin danışmanı Kemal Altın, Zərərli Vərdişlərə qarşı İctimai Birliyin sədri Zaur Orucov, Müasir Psixologiya Mərkəzinin rəhbəri Aida Nəbiyeva çıxış etdilər.
2019-cu il dekabrın 18-də Xəzər Universiteti Psixologiya departamentinin koordinatoru Mələk Kərimova Azərbaycan Respublikası Təhsil Nazirliyi, Azərbaycan Texniki Universitetinin birlikdə təşkil etdikləri “Azərbaycan və Türkiyə universitetləri: təhsil, elm, texnologiya” birinci Beynəlxalq elmi-praktiki konfransında iştirak etdi. M.Kərimova “İncəsənətin sosial hadisə kimi cəmiyyətdə rolu” mövzusunda tezis ilə çıxış etdi. Çıxış zamanı o, Xəzər Universitetində incəsənət sahəsinə də xüsusi diqqət edildiyini və tələbələrdə estetik tərbiyənin formalaşması üçün mədəniyyət dərslərinin də olduğunu qeyd etdi. Mövzu ətrafında müzakirələr zamanı suallar cavablandırıldı.
M.Kərimovanın tədqiqat işi elmi-praktiki konfrans materialları kitabında məqalə kimi çap olunmuşdur.
2019-cu il dekabrın 2-də Əlilliyi olan şəxslərin cəmiyyətin müxtəlif sahələrində qazandıqları uğurların işıqlandırılması yolu ilə digər əlilliyi olan şəxslərin cəmiyyətə inteqrasiyasına dəstək göstərilməsi, eləcə də, gənclərin motivasiyası məqsədilə Dayanıqlı və Operativ Sosial Təminat Agentliyi “Bakı Konqres Mərkəzi”ndə “Dosttalks” adlı tədbir təşkil etdi.
Tədbirdə Xəzər Psixologiya departamentinin koordinatoru Mələk Kərimova da iştirak edirdi. Tədbirdə öz uğurlu həyat yolları ilə hamıya nümunə olacaq qonaqlar çıxış etdilər. Tədbirdə görmə qabiliyyəti məhdud olan uşaqlar müxtəlif musiqi nömrələri ilə çıxış etdilər. “DanceAbility” inklüziv komandasının rəqsi isə tədbirə daha da rəng qatdı.
Tədbirdə millət vəkili Qənirə Paşayeva, Azərbaycan Respublikasının Əmək və Əhalinin Sosial Müdafiə nazirinin müavini Anar Əliyev də məsələ ilə bağlı görülmüş və nəzərdə tutulan fəaliyyətlərdən bəhs etdilər. Bu sahə ilə əlaqədar cəmiyyətin hər bir üzvünün aktivliyinin də əhəmiyyəti üzərində fikir birliyinin zəruriliyi qeyd edildi.
Tədbir sonunda spikerlər diplomlarla təltif edildilər.
2019-cu il dekabrın 3-də Xəzər Psixologiya departamentinin koordinatoru, Xəzər Psixoloji Xidmət Mərkəzinin direktoru Mələk Kərimova AzTV-də “Çıxışa doğru” verilişinin qonağı oldu. Nailə Babayevanın təqdimatı ilə keçirilən verilişin mövzusu yerli və xarici vətəndaşların övladlığa götürmə prosedurları ilə əlaqədar müzakirələrlə bağlı idi. Verilişdə Əmək və Əhalinin Sosial İnkişafı Nazirliyinin əməkdaşı övladlığa götürmə ilə əlaqədar qəbul edilmiş qanunvericiliklə bağlı məlumat verdi.
Psixoloq Mələk Kərimova isə övladlığa götürmə ilə əlaqədar qarşılaşılan çətinliklər, bu məsələlərdə gizlilik prinsipi və götürülən uşaqlara yaş və fərdi psixoloji xüsusiyyətlərinə görə bu məsələnin düzgün şəkildə deyilməsinin əhəmiyyəti üzərində durdu. Eyni zamanda, əlliliyi olan insanların bu proseslə bağlı hüquqları da müzakirə edildi.
Verilişi bu link vasitəsilə izləmək olar:
http://www.aztv.az/canli/aztv-canli.htm
2019-cu il dekabrın 2-də Xəzər Universiteti Psixologiya departamentinin koordinatoru, Xəzər Psixoloji Xidmət Mərkəzinin direktoru Mələk Kərimova Azərbaycan Radiosunda (105FM) aparıcı Vüsalə Rafiqqızının qonağı oldu. O, qadınlarda depressiya əlamətləri və mübarizə yolları ilə əlaqədar ətraflı müzakirələr apararaq, cəmiyyətdə maariflənmənin önəmi üzərində durdu. M.Kərimova Xəzər Universitetinin Psixologiya departamentinin fəaliyyətindən bəhs edərək, tələbələrə və xalqa açıq seminarlarda bu mövzulara həssaslıqla yanaşdıqlarından bəhs etdi. O, eyni zamanda, universitetin bu mövzuya diqqətini qeyd edərək, tələbələrə psixoloji xidmətin zəruriliyini vurğuladı.
2019-cu il noyabrın 29-da Xəzər Universitetinin Psixologiya departamentinin koordinatoru, Xəzər Psixoloji Xidmət Mərkəzinin direktoru psixoloq Mələk Kərimova “Sigmund Freud: Şəxsiyyət nəzəriyyəsi və yuxu analizləri” mövzusunda seminar keçirmək üçün Azərbaycan Universitetinə dəvət edildi. M.Kərimovanın maliyyə ixtisası tələbələri ilə keçirdiyi seminar onlar tərəfindən maraqla qarşılandı. Belə ki, o, seminarda S.Freudun nəzəriyyəsinin əsasları izah edilməklə yanaşı, şüuraltı davranış və hisslər, qorxu, qayğı, psixoloji müdafiə yolları, stress zamanı yaşanan pozuntular, mənlik konsepsiyası, yuxularda yer dəyişmə, özünü istiqamətləndirmə və döndərmə, xəyal qurma, yuxunun fizioloji mahiyyəti və bu kimi mövzuları əhatə etdi.
2019-cu il noyabrın 28-də Xəzər Universitetinin Psixologiya departamentinin koordinatoru Mələk Kərimova və departamentin müəllimi Nilufər Əlizadə Əmək və Əhalinin Sosial Müdafiəsi Nazirliyi və BP-“British Council”-in birgə həyata keçirdiyi “Əlilliyi olan şəxslərin məşğulluq qabiliyyətlərinin artırılması proqramı” çərçivəsində nazirliyin, işəgötürənlərin, o cümlədən, biznes strukturlarının, digər maraqlı tərəflərin nümayəndələrinin, əlilliyi olan şəxslərin iştirakı ilə “Əlilliyi olan şəxslər iş dünyasında” adlı konfransda iştirak etdilər. Konfransda əlilliyi olan şəxslərin uğur hekayələri dinlənilərək, onlarla Xəzər Universitetində həyata keçiriləcək növbəti layihələrin müzakirəsi də aparıldı.
2019-cu il 22-dən 24-dək Xəzər Universiteti Psixologiya departamentinin koordinatoru, Xəzər Psixoloji Xidmət Mərkəzinin rəhbəri Mələk Kərimova Türkiyənin Ankara şəhərində yerləşən Boylam Psixiatriya xəstəxanasında Prof. Ertuğrul Köroğlunun rəhbərliyi ilə təşkil edilmiş Klinik Psixologiya və Psixiatriya Simpoziumda (KLİPPS 2019) iştirak etdi.
M.Kərimova xaricdən dəvət edilən Rasional-Emosional Davranış Terapiyasının supervizoru Chyrsoula Kostagiannisin “REBT”, Linehan İnstitutu təlimçisi Ahmed Abdelkerimin “Dialektik davranış terapiyası”, MINT təlimçisi Graeme Horridgenin “İstəkləndirici görüşmə” təlimlərində iştirak etdi.
M.Kərimova, eyni zamanda, simpozium iştirakçılarına 2020-ci ildə təşkil ediləcək Azərbaycan VII Beynəlxalq Psixologiya Konfransı ilə əlaqəli məlumat verərək, dəvət edilməsi nəzərdə tutulan professor və müəllim heyəti ilə görüşdü.
2020-ci il mayın 20-də Xəzər Universiteti Psixologiya departamentinin koordinatoru Mələk Kərimovanın təşkilatçılığı ilə Nişantaşı Universitetinin müəllimi Dr. Rıdvan Üney “Ailədə cinsi problemlər və cinsi terapiyalar” mövzusunda Xəzər Universiteti tələbələrinə onlayn mühazirə oxudu.
Bakırköy Ruh və Sinir Xəstəlikləri Xəstəxanasında təlim və tədqiqat sahəsində ixtisasını tamamlayan Dr. Ridvan Üney Karabük Dövlət Xəstəxanası və Silivri Dövlət Xəstəxanasında da psixiatr olaraq fəaliyyət göstərmişdir. Tədqiqat sahələri ailə terapiyaları və cinsi terapiyadır. Hazırda İstanbulda Nişantaşında şəxsi mərkəzində işləyir və Nişantaşı Universitetində də akademik fəaliyyətini davam etdirir.
EMDR metodu 1989-cu ildə amerikalı psixiatr Francino Saphiro tərəfindən ortaya qoyulan psixo-fizioloji təməlli bir metoddur. Göz hərəkətləri ilə hissizləşdirmə və yenidən işləmə kimi qeyd edilən bu metod ancaq EMDR Avropa Təşkilatının icazə verdiyi təlimçilər vasitəsilə verilə bilən bir təlimdir.
EMDR Türkiyə təmsilçisi Asena Yurtsever tərəfindən verilən beynəlxalq təlimin birinci modülündə Xəzər Universiteti Psixologiya departamentinin koordinatoru, Psixoloji Xidmət Mərkəzinin rəhbəri Mələk Kərimova da iştirak etmişdir.
Metod bir sıra psixi pozuntular və xüsusilə travmatik yaşam təcrübələri zamanı istifadə edilərək, qısa müddətdə müsbət nəticələr verməkdədir.
Xəzər Universiteti Psixoloji Xidmət Mərkəzinin rəhbəri, Psixologiya departamentinin koordinatoru Mələk Kərimova Türkiyə Respublikası Ruh Sağlığı Dərnəyi və Kim Psixologiya Mərkəzinin təşkil etdiyi "Ölüm və Yas Terapiyası" təlimlərinin hər iki mərhələsini tamamlayaraq, sertifikat almışdır.
Xəzər Universiteti Psixologiya departamentinin koordinatoru psixoloq Mələk Kərimova İ.M.D.A.T. (İntiharla Mücadelede Danışmanlıq Ağına Tutun) layihəsinin Azərbaycan üzrə təmsilçisi seçilib.
Türkiyə Ruh Sağlığı Dərnəyi İ.M.D.A.T. layihəsi ilə Türkiyə Cümhuriyyəti Gənçlik və İdman Nazirliyinin Gənçlik Layihələrinə Dəstək Proqramına müraciət etmiş və layihə təklifi müsbət rəy alaraq qəbul edilmişdir.
Layihənin məqsədi cəmiyyətin sosial problemi kimi ələ alınan intiharların qarşısını almaq məqsədilə insan həyatını qorumağa dəstək olmaqdır. Bu məqsədlə Türkiyə Ruh Sağlığı Dərnəyi Türkiyə daxilində və ölkə xaricində bir dəstək qrupu yaradaraq fəaliyyətləri gücləndirmək, ölkə daxili və xarici maarifləndirici tədbirlərin və təlimlərin keçirilməsini hədəf alır. Layihə çərçivəsində Türkiyə daxilində hər bölgədən bir təmsilçi seçilmiş, xarici ölkələrdən isə hələlik Almaniya, Kipr və Azərbaycana yer verilmişdir.
“Xəzər”in əməkdaşı Mələk Kərimova Azərbaycan üzrə seçilən təmsilçi olmaqla yanaşı, Elmi Konsultasiya Komitəsinə də üzv olaraq daxil edilmişdir.
Layihə haqqında aşağıdaki link vasitəsilə ətraflı məlumat almaq olar:
https://ruhsagligidernegi.org/imdat/
2020-ci il dekabrın 22-də Xəzər Universiteti Psixologiya departamentinin koordinatoru Mələk Kərimovanın təşəbbüsü ilə Türkiyənin Sağlıq Bilimləri Universiteti Hamidiye Tibb fakültəsi Psixiatriya bölümünün professoru Ejder Akgün Yıldırımın tələbələrlə vebinarı təşkil edildi. Qeyd etmək lazımdır ki, professor Ejder Akgün Yıldırım ingilis dilində tibb təhsili almış, fiziologiya sahəsində doktorantura təhsilini tamamlamış, 1999-cu ildə Mərmərə zəlzələsi zamanı Halıdere sağlıq mərkəzi idarəçisi olmuş, 2005-ci ildən etibarən isə, Cinsi Müalicə, Təlim və Tədqiqat dərnəyinin lisenziyalı cinsi terapisti kimi çalışmışdır. Hazırda Sağlıq Universitetində fəaliyyət göstərməklə yanaşı, dərnək fəaliyyətlərini də aktiv şəkildə davam etdirir.
Ailə psixologiyası dərsi çərçivəsində dəvət edilən qonaq professor “Ailədə cinsi problemlər və cütlük münasibətlərindəki rolu” məruzəsi ilə çıxış etdi. Xəzər Universitetinin müxtəlif ixtisaslarından olan 110 tələbənin iştirak etdiyi seminarda fizioloji inkişaf mərhələləri, erkən nikahın mənfi nəticələri və ortaya çıxa biləcək fizioloji və psixoloji fəsadları, cinsi sağlıq, cinsi istismar, cinsəllik haqqında yanlış olan miflər və yanaşmalar əsaslı şəkildə şərh edildi. 3 saat davam edən vebinarda tələbələrin maraqlandıqları suallar cavablandırıldı.
25 illik iş təcrübəsi olan qonaq professor bu sahədəki tədqiqatlara ehtiyac olduğunu söyləyərək, Xəzər Universiteti ilə əməkdaşlıqdan məmnun qaldığını və təşəkkürlərini ifadə etdi.
Xəzər Universitetinin tərəfdaş olduğu Avropa Komissiyasının Erasmus+ proqramının "Mediats" layihəsi çərçivəsində universitetdə 14-18 dekabr "Mediasiya maarifləndirmə həftəsi" elan edildi. Dekabrın 18-də mediasiyanın cəmiyyətdə və universitet tələbələri arasında təbliğinin genişlədirilməsi məqsədilə Psixologiya departamentinin koordinatoru psixoloq Mələk Kərimova tərəfindən bu sahədəki ekspertlərlə birlikdə "Boşanma prosesinin ailə münasibətlərinə təsiri. Ailə mediasiyasının əhəmiyyəti" mövzusunda vebinar təşkil edildi. Vebinarda Ankara Universiteti Hüquq bölümü məzunu, 12 saylı Vəkillər bürosunun vəkili və mediator Qasım Şalıyev, Xəzər Universiteti Hüquq fakültəsi məzunu, Mərkəzi Bankın Sığortalarla bağlı reyesterində müstəqil ekspert, hüquqşünas və mediator İlkin İbrahimov iştirak etdilər.
Vebinarda Mələk Kərimova boşanma prosesinin psixoloji aspektlərini təhlil etməklə yanaşı, universitetin bu sahədəki təcrübələri haqqında iştirakçılara məlumat verdi. Vəkil qonaqlar ölkəmizdə icrasına başlanılacaq mediasiya prosesi haqqında ətraflı məlumat verməklə yanaşı, ailə və kommersiya məsələlərində onun əhəmiyyəti, tətbiqi haqqında maraqlı müzakirələr açdılar. Məhkəmələrin iş yükünün azaldılması və daha sivil cəmiyyətin formalaşmasında mediasiya fəalliyyətinin əhəmiyyətinin zəruriliyi qeyd edildi.
Sonda Mələk Kərimova layihə çərçivəsində Xəzər Universitetində bu sahə üzrə magistr pilləsində təhsildən də bəhs edərək, tələbələrin xarici ölkədə də bu sahədə təcrübə keçə biləcəklərini qeyd etdi.
85 nəfərdən çox iştirakçı ilə keçirilən vebinar sonrasında iştirakçılar tərəfindən doldurulan sorğunun nəticələri onların çox məmnun qaldıqlarını və bu sahəyə maraqlarının artdığını göstərdi.
Xəzər Universiteti Psixologiya departamentinin koordinatoru Mələk Kərimova 2020-ci il mayın 26-dan avqustun 13-dək Ədliyyə Akademiyası tərəfindən təşkil edilən “Mediatorların hazırlığı və ixtisaslarının artırılması təlim qaydası”na uyğun olaraq, ilkin hazırlıq kurslarında aktiv iştirak etdi və yekun imtahanı uğurla verərək, rəsmi olaraq mediator fəaliyyəti ilə məşqul olma mərhələsinə keçid aldı. Kurslarda beynəlxalq ekspertlər Ruslan Mirzəyev və Adi Qavrilla mediasiya prosesinə aid nəzəri məsələləri izah etdilər və praktiki məşğələlərlə, rollu oyunlarla öyrənmə prosesi dəstəklədilər. Kursun sonunda tədbir təşkil edildi. Tədbirdə Avropa İttifaqının Azərbaycandaki səfiri Kestutis Yankauskas, Ədliyyə Akademiyasının rektoru vəzifəsini icra edən Elçin Xələfov, Mediasiya Şurasının İdarə Heyətinin sədri vəzifəsini icra edən Ruslan Mirzəyev çıxış edərək, kursu uğurla bitirənləri təbrik etdilər və mediasiyanın ölkəmiz üçün əhəmiyyətini və ilklər olmanın məsuliyyətini qeyd etdilər.
Qeyd edək ki, məhkəmələrin iş yükünün azaldılması üçün mediasiyanın tətbiqi ilə əlaqədar olaraq, Azərbaycan Respublikası Prezidenti İlham Əliyevin “Məhkəmə-hüquq sistemində islahatların dərinləşdirilməsi” haqqında 2019-cu il 3 aprel tarixli Fərmana uyğun olaraq, Mediasiya Şurası yaradılmışdır. Mediasiya təlimi qurumu kimi fəaliyyət göstərən Ədliyyə Akademiyası Avropa İttifaqı ilə birlikdə layihə həyata keçirərək, mediasiya üçün təlimçilər hazırlayır.
2020-ci il iyunun 24-dən 26-dək Xəzər Universiteti Psixologiya departamentinin koordinatoru və Psixoloji Xidmət Mərkəzinin rəhbəri psixoloq Mələk Kərimova Artvin Çoruh Universiteti və Artvin Təhsil İdarəsi tərəfindən təşkil edilən “Uluslararası Covid-19 Kongresi: Eğitimde Yeni Normlar” adlı e-konfransda dəvətli qonaq spiker olaraq çıxış etdi.
Konfransın əsas məqsədləri Covid-19 pandemiyası müddətində təhsil sahəsində baş verən dəyişikliklər və bu dəyişikliklər istiqamətində aparılan tədqiqatlardan xəbərdar olmaq və bu sahədə əməkdaşlıq və müzakirələrin təşkili idi. Əməkdaşımız Xəzər Universitetinin bu prosesdə gördüyü işlərdən bəhs etməklə yanaşı, apardığı tədqiqat nəticələrini də paylaşdı. Onun “Covid-19 Sürecinde üniversite öğrencilerinin Psikolojik Belirtilerinin İncelenmesi ve Eğitime Yansımaları” adlı mövzusu maraqla qarşılandı və verilən suallar cavablandırıldı.
Artvin Təhsil İdarəsin müdiri Fahri Acar və Hacettepe Universitetinin professoru Tuncay Ergene də M.Kərimovaya təşəkkürlərini bildirdilər. Artvin Təhsil İdarəsinin rəsmi youtube kanalı üzərindən canlı yayınlanan verilişdə 2500 üzərində izləyici iştirak etmişdir.
Bu linklər vasitəsilə daha çox məlumat əldə etmək olar:
http://artvincovidcongress.org
2020-cı il iyunun 7-də Xəzər Universiteti Psixologiya departamentinin koordinatoru, Psixoloji Xidmət Mərkəzinin direktoru Mələk Kərimova İsmayıllı rayonundakı “Niyal” hazırlıq kurslarının xüsusi xahişini nəzərə alaraq, respublikanın orta məktəblərində keçiriləcək buraxılış imtahanlarına psixoloji hazırlıq məqsədilə “Daxili gücüm və imtahan həyəcanım” mövzusunda onlayn psixoloji seminar keçirdi.
Seminara “Niyal” hazırlıq kursunun müdiri Həsən Məmmədov və Xəzər Universitetinə Tələbələrin cəlb olunması üzrə işçi qrupun rəhbəri professor Fuat Rəsulov da qoşuldular. Seminar zamanı Mələk Kərimova abituriyentlərə qəbul imtahanından əvvəl yaşaya biləcəkləri həyəcan zamanı nələr edə biləcəkləri haqqında məlumat verməklə yanaşı, imtahan hazırlığı müddətində edilə biləcəklər üzərində müzakirələr apardı. Tədbirin sonunda abituriyentlərin sualları fərdi qaydada cavablandırıldı və psixoloji dəstək verildi.
2020-ci il mayın 18-də Özəl Boylam Xəstəxanasının həkimi psixiatr Dr. Erkan Kuru növbəti dəfə klinik və ümumi psixologiya ixtisası üzrə magistratura təhsili alan tələbələr üçün mühazirə oxudu.
Psixiatr psixofarmokologiya və psixoloqların bu sahə ilə əlaqəli nələri bilməli olduqları haqqında fikir və biliklərini tələbələrlə bölüşdü.
Xəzər Universiteti Psixologiya departamentinin koordinatoru Mələk Kərimovanın təşkilatçılığı ilə təşkil edilən onlayn dərslərlə bağlı xoş təəssüratlarını bildirən doktor Erkan Kuru Xəzər Universiteti tələbələri ilə ünsiyyətdən məmnunluğunu bildirərək, gələcək psixoloqlara peşə inkişafı ilə bağlı məsləhətlərini verdi.
Yekunda professor Fuat Rəsulov 11-ci sinif şagirdlərinə Xəzər Universiteti haqqında qısa məlumat verərkən, universitet tərəfindən İsmayıllı rayonunda mütəmadi tədbirlər keçirildiyini bildirərək, seminara qoşulan iştirakçılara öz təşəkkürünü bildirdi.
“Niyal” hazırlıq kursunun müdiri Həsən Məmmədov isə Mələk xanım Kərimovaya və Xəzər Universitetinin rəhbərliyinə bu seminarın təşkilinə görə minnətdarlığını bildirdi.
2020-ci il iyulun 10-da Varyox.az saytında Xəzər Universiteti Psixologiya departamentinin müəllimi və elmi işçisi Ülkər İsayevanın “Azərbaycan folkloru və ədəbiyyatı, qadın haqları və psixoloji analiz” adlı məqaləsi çap olunmuşdur.
Məqaləni tam şəkildə bu link vasitəsilə oxumaq olar:
https://varyox.az/analizator/azerbaycan-folkloru-psixoloji-analiz/.
2020-ci il iyunun 30-da Xəzər Universiteti Psixologiya departamentində onlayn formada ümumi psixologiya və klinik psixologiya ixtisası üzrə magistratura tələbələrinin dissertasiya işlərinin müdafiəsi təşkil edildi. Müdafiə Şurasında Xəzər Universiteti Psixologiya departamentinin koordinatoru Mələk Kərimova, p.ü.f.d., dosent Lalə Cabbarova, p.ü.f.d. Müşfiq Mustafayev, p.ü.f.d. Afərin Abbasova iştirak edirdilər.
Ümumi psixologiya ixtisası üzrə magistr tələbələri –Dəniz Umarova (elmi rəhbər: Lalə Cabbarova) “Müəllim kollektivində mobbinq fenomeninin təzahür xüsusiyyətləri”; Sevda Məsimzadə-Soltanova (elmi rəhbər: Müşviq Mustavayev) “İlkin analıq dövründə qadınların sosial-psixoloji xüsusiyyətlərinin təhlili”; klinik psixologiya ixtisası üzrə magistr tələbəsi Xədicə Həbibullayeva isə (elmi rəhbər: Afərin Abbasova) “Yeniyetmələrdə internet asılılığı ilə aqressiv davranışlar arasında əlaqənin təhlili” adlı dissertasiya işlərini uğurla müdafiə etdilər.
Müdafiəyə təqdim olunan işlər müzakirə olundu və iddiaçılar şura üzvlərinin suallarını cavablandırdılar. Müdafiə prosesi müvəffəqiyyətlə keçdi, təqdim olunan işlər müsbət qiymətləndirildi və iddiaçılara magistr dərəcəsi verilməsi qərara alındı.
2018-ci il oktyabrın 28-də Xəzər Universitetinin tələbələri aralıq imtahanından əvvəl Dədə Qorqud parkına toplaşaraq peşəkaryoqa təlimçisi Bəxtiyar Sadıxovun rəhbərliyi ilə yoqa-meditasiya sessiyasına qatıldılar. Universitetin Psixologiya departamentinin müəllimi Nilufər Əlizadənin təşkil etdiyi imtahandan öncə tələbələri ruhlandırmaq və sağlam məşğuliyyətlər təbliq etmək məqsədi daşıyan, yoqa sessiyasına tələbələr maraq göstərdilər və aktiv iştirak etdilər. Tələbələrin təliminə ətrafda istirahət edən insanlar da qoşuldular.
2018-ci il noyabrın 12-də Xəzər Universitetinin Psixologiya Departamentinin koordinatoru, Xəzər Psixoloji Xidmət Mərkəzinin direktoru psixoloq Mələk Kərimova Azərbaycan İlahiyyat İnstitutunun dəvəti ilə “Səssiz filmim: Mən və aynam” seminarını təşkil etdi. Təlimdə məqsəd gənclərin daxili dünyalarını tanımalarına dəstək olmaq, onların özləri və ətraf mühitlə əlaqələrində rol oynayan amilləri şərh etmək, şəxsin daxili dünyasında etdiyi səssiz söhbətlərin onların istək və motivasiyalarına necə təsir etdiyi göstərməkdir. Təlim gənclərin mənəvi cəhətdən özlərini daha yaxşı tanıyaraq, daxili potensiallarını ortaya çıxarma yolları üzərində dayanma, problemi həll etmə bacarıqlarına fokuslanmışdır.
Tədbir interaktiv şəkildə davam etdirildi. Təlimdən məmnun qalan tələbə və müəllim heyəti Xəzər Universiteti ilə qarşılıqlı əməkdaşlıqdan məmnuniyyətlərini ifadə etdilər.
2018-ci il sentyabrın 27-də Xəzər Universiteti Psixologiya departamentinin müəllimi Nilufər Əlizadənin təşkilatçılığı ilə “Guide to be a student” adlı seminar keçirildi. Seminarda Humanitar və Sosial Elmlər fakültəsinin birinci kurs tələbələri iştirak edərək, universitet həyatında baş verə biləcək çətinliklərin qarşısının alınması barəsində məlumat adılar. Tələbələr aktiv müzakirələrdə iştirak edərək, sonda öz suallarını da ünvanladılar. Seminarda tələbələrə Xəzər Universitetinin Psixologiya və Konsultasiya Mərkəzi haqqında da məlumat verildi, ehtiyac olduqda, mərkəzə müraciət edə biləcəkləri qeyd olundu.
2018-ci il noyabrın 12-dən 16-dək Xəzər Universitetinin əməkdaşları –İqtisadiyyat və menecment fakültəsinin dekanı Dr. Ceyhun Məmmədov, Siyasi elm və beynəlxalq münasibətlər departamentinin koordinatoru Elmar Mustafayev, Psixologiya departamentinin müəllimi Nilufər Əlizadə, İngilis dili və ədəbiyyatı departamentinin müəllimi Rəna Həsənova Tbilisi Dövlət Universitetində keçirilən “Cənubi Qafqaz və Norveçdə akademik və iş mühitində mədəniyyətlərarası qarşılaşmalar” adlı layihənin müəllimlər üçün təşkil olunan ikinci görüşündə iştirak etdilər. Layihə Oslo Metropolitan Universiteti, Tiflis Dövlət Universiteti və Xəzər Universitetinin nümayəndələrini yenidən bir araya gətirdi.
Görüşün məqsədi indiyədək görülən işləri qiymətləndirmək, müvafiq olaraq layihənin məqsəd və planını nizamlamaq, yay məktəbinin proqramına daxil olacaq fəaliyyətlərin detallı siyahısını təkmilləşdirmək və bu işdə məsul olan personalı müəyyənləşdirmək idi. Eyni zamanda, layihə çərçivəsində təşkil olunacaq fənlərə qeyri-akademik tərəfdaşların cəlb edilməsi yolları nümayəndələr tərəfindən müzakirə edildi.
2018-ci il noyabrın 20-də Xəzər Universitetində MD, PhD İkram Rüstəmov “Uşaqlarda inkişaf pozuntuları” mövzusunda təlim keçirdi. Təlimi universitetin Psixologiya departamentinin müəllimi Nilufər Əlizadə təşkil etmişdi.
Təlimdə Xəzər Universitetinin Psixologiya ixtisasının tələbələri ilə yanaşı, ADPU, Bakı Biznes Universitetinin tələbələri, eyni zamanda, Loqos Psixologiya və Nitq İnkişaf Mərkəzinin psixoloqları, Baki şəhəri və Abşeron rayonundan çox sayda məktəb və bağça psixoloqları təlimə qatıldılar. Təlim boyu Dr. İkram Rüstəmov uşaqların inkişaf pozuntuları zamanı baş verən yanlış diaqnostikanın qarşısının alınmasından, bu sahədəki yeniliklərdən və xarici konfransdakı çıxışlarından statlar gətirdi
Sonda İ.Rüstəmov iştirakçıların suallarını cavablandırdı.
Qeyd edək ki, Dr. İkram Rüstəmov 2014-2015-ci illərdə Boston Usaq Xəstəxanası doktor-elmi işçi və Harvard Universiteti Tibb fakültəsində qonaq assistent professor kimi çalışmışdır.