Xəzər Universitetinin Dillər və ədəbiyyatlar departamentinin əsas vəzifəsi universitetin bütün fakültələrində Azərbaycan dilini, Azərbaycan və Dünya ədəbiyyatını tədris etmək, bu fənlər üzrə bakalavr, magistr və doktorantlar hazırlamaqdır. Dillər və ədəbiyyatlar departamenti eyni zamanda ikinci xarici dil olmaqla alman, fransız, italyan, çin dillərinin tədrisini həyata keçirir.  

Universitetin “Təbiət elmləri və mühəndislik”,  “İqtisadiyyat və Menecment” , “Humanitar, təhsil və  sosial elmlər” fakültələrində  Azərbaycan dili və ədəbiyyatı qeyri-ixtisas fənni olaraq öyrədilir. Adları çəkilən fakültələrdə departament daha çox Azərbaycan dili və Azərbaycan ədəbiyyatı fənlərinin tədrisində ümumi məlumat, tanışlıq xarakterli məzmuna üstünlük verir.

“Humanitar, təhsil, sosial elmlər” fakültəsinin “Azərbaycan dili və ədəbiyyatı müəllimliyi” ixtisası üzrə bakalavriat səviyyəsində departamentin məqsədi yüksək səviyyəli, peşəkar müəllimlər hazırlamaq üçün Azərbaycan dili və ədəbiyyatını (o cümlədən Dünya ədəbiyyatını) tələbələrə bütün mərhələ və dövrləri, bölmə və sahələri ilə nəzəri və praktik şəkildə tədrisini təşkil etməkdir.

“Humanitar, təhsil və sosial elmlər “fakültəsinin Azərbaycan dili və ədəbiyyatı (filologiya)” ixtisası üzrə bakalavriat səviyyəsində departamentin məqsədi tələbələrə müasir Azərbaycan dilinin qrammatik strukturunu, bölmələrini geniş şəkildə öyrətməklə yanaşı dilçilik, ədəbi dil tarixi haqqında məlumat vermək, Azərbaycan ədəbiyyatının (o cümlədən Dünya ədəbiyyatının) xronoloji ardıcıllıqla öyrənilməsini həyata keçirmək, müxtəlif dövrlərdə yaşamış yazıçı və şairlərin həyat və yaradıcılığını öyrətmək, ilkin nəzəri məlumatlarla təmin etməkdir.

“Humanitar, təhsil və sosial elmlər” fakültəsinin hər iki ixtisası üzrə magistratura səviyyəsində təhsil alan magistrantlara dil və ədəbiyyatın ayrı-ayrı problemlərini dərindən öyrətmək, onların nəzəri hazırlığını artırmaq, təhlil və tətbiqetmə, mətn üzərində işləmək bacarığını aşılamaq departamentin əsas məqsədidir.

Departament doktorluq səviyyəsində təhsil alanların ümumi nəzəri hazırlığını yüksəltməklə bərabər, dil və ədəbiyyatın ayrı-ayrı problemləri üzrə onları tədqiqat işlərinə yönəltməyi fəaliyyətinin əsas istiqaməti hesab edir.

Dillər və ədəbiyyatlar departamenti dil və ədəbiyyatın müxtəlif istiqamətləri, problemləri üzrə tədqiqat işlərinin aparılması, tələbələr üçün tədris vəsaitlərinin hazırlanmasını, elmi seminar və müzakirələrin, simpozium və konfransların təşkilini, tələbələrin tədqiqat işlərinə cəlb edilməsini elmi fəaliyyətinin əsas istiqamətlərindən biri hesab edir.

Departament universitetin sosial həyatında yaxından iştirak etməyi, ədəbiyyat müzakirələri, şeir gecələri, qiraət yarışları təşkil etməyi, universitetin hazırladığı tədbirlərdə tələbələrin fəallığını təmin etməyi də fəaliyyət planın mühüm hissəsi hesab edir.