2021-ci il yanvarın 11-də Dövlət Gömrük Komitəsinin Akademiyasının təşəbbüsü və təşkilatçılığı ilə "Azərbaycan ali məktəblərində onlayn təhsil təcrübəsi: çağırışlar və perspektivlər" adlı onlayn konfrans keçirilib.
Konfrans Gömrük Akademiyası tərəfindən Azərbaycanda pandemiya şəraitində ali məktəblərdə məsafədən təhsil prosesinin problemlərini və imkanlarını araşdırmaq məqsədi ilə həyata keçirilmiş layihənin hesabatının təqdimatına və məsafədən təhsilin problemlərinin müzakirəsinə həsr olunub.
Tədbirdə Milli Məclisin, Təhsil Nazirliyinin, Təhsil Nazirliyi yanında İctimai Şuranın, Azərbaycanın 25 ali təhsil müəssisəsinin, həmçinin Türkiyə Ali Təhsildə Keyfiyyət Şurasının (YÖKAK) və Çankaya Universitetinin nümayəndələri iştirak ediblər.
Akademiyanın rəisi Qulu Novruzov layihə barədə danışaraq, sözügedən tədqiqatın Azərbaycanda təhsilin onlayn tədrisə keçidi ilə bağlı aparıldığını, pandemiya şəraitində Azərbaycan ali məktəblərində məsafədən təhsilin problemləri ilə bağlı olduğunu bildirib. O, layihənin nəticələrinin Azərbaycanda təhsil alan 4 minə yaxın tələbənin sorğusu əsasında aparılmış tədqiqat, təhlil əsasında hazırlanmış hesabat olduğunu deyib.
Layihə müəllifləri - Gömrük Akademiyasının Monitorinq və qiymətləndirmə şöbəsinin rəisi Araz Aslanlı, Xəzər Universitetinin Humanitar, təhsil və sosial elmlər fakültəsinin dekanı Elza Səmədova və təhsil eksperti Könül Abaslı layihə barədə tədbir iştirakçılarına geniş məlumat veriblər. Tədqiqatda məqsədə çatmaq üçün qoyulan suallar, əldə edilən nəticələr haqqında danışıblar. Qeyd edilib ki, tədqiqatın nəticələri elmi məqalə formatında beynəlxalq jurnalda nəşr olunacaq.
Çıxış edən təhsil ekspertləri, ali məktəblərin rəhbər işçiləri Azərbaycan ali təhsil müəssisələrində bu tədqiqatın ilk araşdırma olduğunu, aktuallığını qeyd ediblər.
Konfransda geniş fikir mübadiləsi aparılıb, təkliflər dinlənilib, suallar cavablandırılıb.
Tədbir AZƏRTAC və digər xəbər portalları tərəfindən geniş işıqlandırılıb: