2021-ci il yanvarın 7-də Xəzər Universiteti Middlesex Universiteti (İngiltərə) ilə birlikdə Creative Spark layihəsi çərçivəsində silsilə vebinarların 2-cisini təşkil etdi. Əsas mövzusu “Sahibkarlıqda qadınlar - çətinliklər və imkanlar” olan seminarların bu dəfəki qonağı Zara Hüseynova idi. O, “WoWoman” (“Qadınların gücü” platforması ilə yanaşı, “ALZA boutique and Milana Gelinlik2”, “W_Space”, “ReStart”, “Speak Global”, “Limonlu.az” kimi bir neçə şirkətin yaradıcısıdır. Əlavə olaraq, Zara Hüseynova “TEDxGermany”, “Latitude 59”, “Startup weekend” kimi bir sıra böyük tədbirlərdə natiqlik edib.
MS TEAMS proqramı vasitəsilə baş tutan tədbir İnkişaf mərkəzinin direktoru Raziyə İsayevanın giriş sözü ilə başladı. O, Creative Spark layihəsi çərçivəsində keçirilən silsilə seminarların məqsədindən danışdı. Sonra Zara Hüseynova 18 yaşından başladığı sahibkarlıq təcrübəsini tələbələrlə bölüşdü.O, sahibkarlıqda önəmli olan motivasiya, plan və işçi ilə işə götürənin arasındakı münasibətlərin vacibliyindən danışdı.
Seminar ərzində qadın sahibkarların üzləşdikləri çətinliklər və fürsətlər barədə çox maraqlı müzakirələr aparıldı.
Tədbirdə Xəzər Universitetinin tələbə və əməkdaşları ilə yanaşı Sumqayıt Dövlət Universitetinin tələbələr də iştirak edirdilər.
Görüş sual cavab sessiyası ilə yekunlaşdı.