2020-ci il fevralın 24-də Xəzər Universitetinin “Mərmər” zalında “Son nəfəsədək” filminin nümayişi və yaradıcı heyətilə görüş keçirildi. Görüşü giriş sözü ilə Dillər və ədəbiyyatlar departamentinin müdiri dosent Dilbər Zeynalova açaraq, 1992-ci il fevralın 26-da erməni qəsbkarlarının Azərbaycan xalqına qarşı misli görünməmiş soyqırım, amansız qırğın aktı törətdiyindən danışdı. O, bu soyqırımın ölkəmizin dövlət müstəqilliyini, ərazi bütövlüyünü hədəf almış məqsədyönlü irticaçı siyasətinin növbəti qanlı səhifəsi olmaqla bərabər, təkcə xalqımıza deyil, bütün insanlığa qarşı irimiqyaslı cinayət olduğunu vurğuladı.
Daha sonra isə real hadisələr əsasında çəkilən “Son nəfəsədək” filmi nümayiş olundu. Filmin ssenaristi və baş prodüseri Nurəddin Aslanovun sözlərinə görə, filmin orijinal tərəflərindən biri, Qarabağ müharibəsinin ilkin mərhələsindən Xocalı Soyqırımına qədər olan dövrü əhatə etməsidir. Ekran işində İlqar Cahangir, Eldar Bağırbəyov, İlqar Musayev, Vüqar Vəlixanov, Elşən Rüstəmov, Ülviyyə Rza, Elçin Əfəndi, Namis Şirməmmədov, Rövşən Kərimduxt, Taleh Yüzbəyov, Novruz Cəfərov, Vaqif Kərimov və başqaları çəkilmişlər.
Filmin nümayişindən sonra Xəzər Universitetinin rektoru dosent İradə Xəlilova Qarabağ münaqişəsi ilə bağlı reallıqların bugünkü və gələcək nəsillərə çatdırılması üçün belə filmlərə böyük ehtiyac duyulduğunu qeyd etdi və filmin ərsəyə gəlməsində əməyi keçən hər kəsə təşəkkürünü bildirdi.
Tədbirdə çıxış edən İctimai əlaqələr və media üzrə direktor Əlövsət Əmirbəyli vətənpərvərlik mövzusunda çəkilən belə filmlərin gənc nəslin vətənpərvərlik ruhunda tərbiyəsində müsbət rol oynadığını xüsusi vurğuladı, əməyi keçənlərə minnətdarlığını bildirdi.
Tədbirin sonunda yaradıcı heyət tələbələrlə Qarabağ həqiqətləri haqqında fikir mübadiləsi apardı.