2020-ci il fevralın 12-də Xəzər Universitetinin təşkilatçılığı ilə “Potensial məktəb direktorları XI” kursunun müdavimləri layihə rəhbəri İnkişaf Mərkəzinin direktoru Raziyə İsayevanın təşəbbüsü ilə Xəzər Universiteti “Dünya” məktəbinin direktor və müəllim heyəti ilə görüş təşkil olundu. Görüşdə “Dünya məktəbi”nin yaranması, strategiya və məqsədləri haqqında təqdimat nümayiş olundu.
Təqdimatda Raziyə İsayeva məktəbin inkişaf yolundan, əldə etdiyi uğurlardan, təhsil sistemində istifadə etdikləri metod və üsullardan, şagirdlərin inkişaf yolundan və məktəbin 20 illik təcrübəsindən danışdı. Təqdimat zamanı müdavimlər ilə diskussiya təşkil olundu və suallara cavab verildi. Onlar sinif otaqları, laboratoriyalar, şagirdlərin əl işləri olan guşələr, məktəbin divarlarında təsvir olunmuş rəsmlərlə tanış oldular.
Görüş çay süfrəsi ətrafında davam etdi. Çay süfrəsində təhsil, təhsilin idarə olunması və məktəblərdəki problemlər barədə bir sıra mövzular müzakirə olundu.
Qeyd edək ki, 2019-cu il noyabrın 13-dən Xəzər Universitetinin təşkilatçılığı ilə “Potensial məktəb direktorları XI” kursunun təlimləri keçirilir. Kurs müddətində Təhsilin idarəolunması, maliyyə, statistika, qanunvericilik, təhsil hüququ və IKT fənləri üzrə təlimlər keçirilmişdir. Kursu Humanitar, sosial elmlər və təhsil fakültəsinin dekanı dosent Elza Səmədova, İnkişaf Mərkəzinin direktoru Raziyə İsayeva və digər fənlər üzrə peşəkar müəllimlər tədris edirdilər. Təlim müddətində ölkəmizin müxtəlif bölgələrindən gələn və direktor müavinləri müasir dövrdə qloballaşan dünya təhsilinin və təhsil müəssisələrində idarəetmə biliklərinin dərin məqamları ilə tanış oldular, təhsilin inkişaf və tətbiq olunma üsullarının ən son metodlarını öyrəndilər.
Potensial məktəb direktorları kursu 2014-cü ildən fəaliyyətə başlamış, 670 nəfərdən çox məzuna sertifikat vermiş, onlardan 50 nəfərdən çoxu direktor, direktor müavini təyin olunmuşdur.