Xəzər Universitetinin Həyat elmləri departamentinin müdiri Asəf Ömərov və departamentin dosenti Cavid Ocaqi 2020-ci il fevralın 10-dan 14-dək İranın Ərdəbil İslam Azad Universitetində elmi ezamiyyətdə oldular. Ərdəbil İslam Azad Universitetinin rektoru Dr. İshaq Rəsuli Xəzər Universitetinin əməkdaşlarını qəbul etdi və iki universitet arasında gələcək birgə elmi işlərin aparılması haqqında geniş müzakirələr aparıldı. Dr. İshaq Rəsuli universitetin maddi texniki bazasının və müəllim kontingentinin mükəmməl olmasının ortaq elmi işlərin aparılması və tələbə mübadiləsi üçün yaxşı zəmin yaratdığını bildirdi. O, həmçinin, iki universitet arasında magistr və doktorantların ortaq elmi rəhbərlərinin təyini, ikili diplom və birgə elmi konfranslar və təlim kurslarının keçirilməsinin hər iki universitet üçün əhəmiyyətli olacağını vurğuladı. Qəbulda rektorun müşaviri, Beynəlxalq Komissiyanın üzvü Dr. Məhəmməd Zəifizadə, Beynəlxalq Komissiyanın üzvü Səid İbadi, Beynəlxalq ofisin müdiri Dr. Taha Pəyam, Tibb fakültəsinin icraçı müdiri Dr. Məhəmməd Cahanbin və həmin fakültənin dekanı Dr. Məsud Fərdin də iştirak edirdilər.
Ərdəbil İslam Azad Universitetinin ən maraqlı işlərindən biri əldə olunmuş elmi nəticələrin praktikaya tətbiq olunmasıdır. Belə ki, bu universitet özəl şirkətlərə universitetin daxilində imkan yaradaraq, onlara elmi dəstək olmuş və bir çox məhsulların bazara çıxarılmasına zəmin yaratmışdır. Xəzər Universitetinin əməkdaşları belə şirkətlərdən biri-dərman bitkilərindən preparatların hazırlanması və satışı ilə məşğul olan “Daniş Bunyan” şirkətinin əqrəb fermasında “Daniş Bunyan Gen Qostər Qohəran” şirkətinin alimlərinin əqrəblərin çoxaldılması, yemləndirilməsi və onlardan zəhərlərin alınması prosesi ilə tanış oldular. Bu zəhər ilə siçanlarda altsheymer xəstəliyinin müalicə olunmasının nəzəri və praktik elmi əsasları Xəzər Universitetinin əməkdaşlarının nəzərinə çatdırıldı.
Xəzər Universitetinin müəllim heyəti on beş minə yaxın tələbəsi olan Ərdəbil İslam Azad Universitetinin müxtəlif laboratoriyalarına, o cümlədən, biotexnologiya, hüceyrə və toxuma kulturası, genetik və kimya instrumental təhlil laboratoriyalarına baş çəkərək, onların apardıqları elmi işlərlə də tanış oldular.