2016-cı il noyabrın 1-də Beynəlxalq Mətbuat Mərkəzində rəssam Rəis Rəsulzadənin 70 illik yubileyi ilə əlaqədar tədbir keçirildi. Tədbirdə Xəzər Universiteti Tarix və arxeologiya departamentinin müəllimi, tarix elmləri doktoru Nəsiman Yaqublu, millət vəkilləri Rafael Hüseynov, Vahid Əhmədov və Fazil Qəzənfərov, şair Teyyub Qurban, Cəfər Cabbarlının nəvəsi Qəmər Seyfəddinqızı, Pedoqoji Universitetin dekanı Laçın Həsənova, tədqiqatçı-jurnalist Nəcibə Bağırzadə, rəssam Rza Əfşar, R.Rəsulzadənin sənət dostları, əməkdar rəssamlar, tələbələri, tələbə yoldaşları və Xəzər Universitetinin tələbələri də iştirak edirdilər.
Rəis Rəsilzadənin 70 illik yubileyi münasibətilə təşkil olunmuş tədbiri açaraq, Nəsiman Yaqublu Rəis Rəsulzadənin həyatı və yaradıcılığı haqqında məlumat verdi. N.Yaqublu çıxışında Rəis bəyin atası Azər Rəsulzadə ilə görüşündən danışdı. O, öz çıxışının yekununu Məhəmməd Əmin Rəsulzadənin “Bəşər mədəniyyəti ayrı-ayrı xalqların mədəniyyətlərinin yekunudur,” sözləri ilə başa vurdu.
Görkəmli ədəbiyyatşünas, tanınmış ictimai xadim, yazıçı, publisist, tərcüməçi, mətnşünas, Azərbaycan Yazıçılar Birliyinin üzvü, Nizami Gəncəvi adına Milli Azərbaycan Ədəbiyyatı Muzeyinin direktoru, Filologiya elmləri doktoru, AMEA-nın həqiqi üzvü, akademik, Milli Məclisin Mədəniyyət komitəsinin sədri Rafael Hüseynov odlu çıxışı ilə seçildi. Rafael Hüseynov Azərbaycan Xalq Cümhuriyyətinin qurucuları olan Məhəmməd Əmin Rəsulzadə, Məhəmməd Həsən Hacınski, Əlimərdan bəy Topçubaşovun çətin və kəşməkeşli həyat tarixçəsindən qısa məlumat verdi. Daha sonra millət vəkilləri Fazil Mustafa və Vahid Əhmədov öz təbrik çıxışlarını etdilər.
Görkəmli dramaturq Cəfər Cabbarlının nəvəsi Qəmər xanım Məhəmməd Əmin Rəsulzadə ilə Cəfər Cabbarlının ailəvi dostluğundan söhbət açdı.
“Azərbaycan həsrəti”, “Gecikmiş etiraf kimi” kitabların müəllifi olan, Rəsulzadə ailəsini araşdıran Nəcibə Bağırzadə öz kövrək çıxışı ilə seçildi. İlk dəfə Azər Rəsulzadəni Qazaxıstanın Karakanda şəhərində axtarıb-tapan şair, dramaturq, publisist, Azərbaycan Yazıçılar Birliyinin üzvü, Azərbaycan gənclərinin III Ümumrespublika festivalının laureatı, Rəsul Rza mükafatı laureatı Teyyub Qurban tarixi faktlara əsaslanan çıxışı ilə seçildi. O, Rəsulzadə ailəsi ilə bağlı yeni yazdığı kitabını Rəis Rəsulzadəyə hədiyyə etdi.
Tədbirdə, həmçinin, Xəzər Universitetinin tarixçi tələbələri də iştirak edərək, öz təbriklərini və hədiyyələrini Rəis Rasulzadəyə təqdim etdilər. Onlar müasir Azərbaycan gəncləri olaraq, damarlarından ulu öndərimizin qanı axan, Məhəmməd Əmin Rəsulzadə kimi dahi bir şəxsiyyətin nəvəsinin, Azərbaycanın dəyərli rəssamı Rəis Rəsulzadə ilə tanış olmaq şərəfinə nail olduqları üçün xoşbəxt olduqlarını ifadə etdilər.
Sonda Rəis Rəsulzadə hər kəsə onun 70 illik yubileyinə gəldiklərinə görə, öz təşəkkürünü bildirdi.